Ba kynnoh shah shim kabu, kyntu ki nongrep ïa ka sorkar ban pyntrei hok ïa ki kam pynroi ki nongrep

Nongpoh, Ïaiong 12: Ki katto katne ki nongrep na ka Shnong Shakhoikuna ha Ri Bhoi District mynta ka sngi ki la pynpaw ïa ka jingsngewkhia kaba dei halor ka jingkynnoh ba la don ki riew shim kabu kiba pan bhah wat ïa ki kam pynroi ba la mang da ka sorkar na ka bynta ki nongrep.
Kine ki nongrep ki dei na ka Shnong Shakhoikuna ha Ri Bhoi District ha kaba ki la ioh ïa ki kam pynroi ban kyntiew ïa ka rep ka riang lyngba ka NABARD ban shna ïa ki Nala um bad ki pung (Check dam) ha ki jaka rep, hynrei kumba la kynnoh da kine ki nongrep la kynnoh ba ki la don ki ba shim kabu da kaba dawa bhah lang halor ka jingwan rah ïa katei ka kam ioh jingmyntoi ki nongrep hapoh katei ka shnong.
Kine ki nongrep kiba la mih shakhmat ban kren halor kane ka jingshah shim kabu ki kynthup ïa u Bah Khil Maring, ka Kong Mary Rose Makri bad u Bah Jermel Makri.
Kumba la pynpaw da kitei ki nongrep la ong ba la don kawei ka skhim lyngba ka NABARD ba la tip kum ka Rural Infrastructure Development Fund ha kaba la ïarap kyrpang ïa ki nongrep ban shna ïa ki nala um bad ki tlong um ha ki jaka rep, hynrei la don ki ba pyrshang ban shim kabu da kaba shna wat ïa ka Committee bad nalor kata ki dawa bha haduh 30% na katei ka mang pisa ba la ioh jingmyntoi ki nongrep.
Ki la ong ruh ba kim kwah ban pynpaw kyrteng ïa kano ka department ne ka tnad treikam sorkar, hynrei kim kwah ban don kum kine ki jingshah pynthud ïa ka bhah ki nongrep ha kaba mynta ka sngi ruh dei lyngba ka jingïarap u General Secretary ka Hills Farmer Union, u Bah Alfonse Kharsyntiew ba ki la ioh lut ïa ka mang tyngka jong katei ka skhim kumba la buh da ka sorkar, hynrei la jin ba ym tuklar utei u nongïalam ka Hills Farmer Union ki la thmu ban ot haduh 30% ka pisa bad da ka jingïarap utei u nongïalam ki la ioh lut ïa ka bhah kumba la mang da ka sorkar, ki la pynpaw.
Namarkata, kitei ki nongrep ki la kyntu ïa ka sorkar ne wat ïa ki tnad treikam sorkar bapher bapher ba lada don kino kino ki kam pynroi jong ki paidbah ne ki nongrep, ki dei ban pyntreikam hok kumba la mang da ka sorkar, namar lada don kum kine ki jingpynthud kane ka ktah ïa ka hok ki paidbah bad ba kum kine ki jingjia kin nym don ban don jaka ha kino kino ki tnad sorkar kiba pyntrei ïa ki kam pynroi jong ki paidbah, ki la bynrap shuh shuh.