Nongstoiñ, Ïaïong 22: Ka jingjot rathai bad ka jingsynjor jong ka jingkieng ha ka wah Kynshi kaba don ha ka shnong Kynroh, kaba pyniasoh ïa ka Nongstoiñ bad ki shnong naduh Nongkynjang, Nonglwai, Rangblang, Laitjynrai sha Mawkyrwat bad shaduh Wahkaji, Phlangdiloiñ, Pyndengumjaraiñ, Mawjai, Tynñiaw haduh Nongummer, ka la buh ïa ki paitbah ha ka jingma kaba khraw lada jia ba kan dkut ha kano kano ka por.
Ha kaba ïadei bad ka jingjot rathai bad jingsynjor jong katei ka jingkieng, la ïoh ban ïa kren bad u bah Korne Kharbani sordar shnong barim jong ka shnong Mawthungkper, u la ong ba man ka sngi da ki phew tylli ki kali ba kynthup naduh ki trok, ki bus bad ki taxi bad haba ki ïaid katei ka jingkieng ka khih ñiun ñiun kumba kan pra noh.
U la ong ruh ba katei ka jingkieng kam don paia satia napdeng bad dei na kata ka daw ba lada ïaid ki trok kiba kit khia lei lei lada peit imat ba kan sa dkut noh. U la ong ruh ba lada ka sorkar kam maramot noh kloi ïa katei ka jingkieng, khlem artatien ha kano ma ka sngi ka lah ban dkut kynsan ha ka por ba dang ïaid ki kali bad kan wanrah ka jingmynsaw ïa ki paitbah nongleit nongwan.
U la ong ba lada jia ba kan dkut ha ka por ba ka Kompeni kaba shna ïa ka surok Nongstoiñ-Wahkaji, ki paitbah kin ïakynduh jingeh haduh katta katta khamtam ki khynnah skul kiba wan na Nonglwai sha Kynroh bad kiba na Kynroh sha Nongkynjang, namar ki skul ki don ha baroh ar liang ka wah Kynshi. U la ong ruh ba ka Kompeni kaba shna ïa katei ka surok, ka la dei ban pyndep nyngkong eh ïa ka jingkieng, khnang ba kan ym buh jingeh ïa ki paitbah ha ka leit ka wan.
La ïoh ban ïakren bad ki nongñiah kali kamai kiba ïaid lyngba katei ka jingkieng, ha kaba ki la pynpaw ïa ka jingsngewkhia namar lada dei ha ka por slap ki jaka ba la pait natduh hatduh jong katei ka jingkieng ki dap um bad ym lah ban ïohi hangno ka at hangno ka them. Ki la ong ruh ba lada long kaba lah, ki bor sorkar ki dei ban phah maramnot noh, lymda kumta kan buh ïa ki nongñiah kali ha ka jingeh kaba khraw.
