Shongshit sa ka sem UDP, khreh pynïasoh 5 ngut ki MLA ka Cong, TMC bad HSPDP

Shillong, Iaiong 21 : Ka jingkhring briew na ka bynta ka elekshon MLA ka ban long ha u 2023 kam shongshit shuh mynta tang ha ka Sem NPP hynrei ka la shongshit wat ha ka Sem ka UDP ruh namar kane ka seng riewlum kaba khlaiñ ka kylla long kawei na ki party kaba sdang ban thnem bha ha ka jingwan pan tiket da ki MLA na kiwei pat ki party.
Katkum ki tyllong khubor kiba tikna la ïathuh ba tad haduh mynta, ki la don haduh kumba san ngut ki MLA kiba ka jingïakren ka la ïaid shakhmat na ka bynta ba kin aireng noh na ka tiket UDP ha ka elekshon MLA 2023.
Kine ki long ar na ka Congress kata u bah Process T Sawkmie MLA ka Mawlai bad u bah Mayralborn Syiem MLA ka Nongpoh, arngut na ka TMC bah Hima Shangpliang MLA ka Mawsynram bad bah George B Lyngdoh MLA ka Umroi Constituency bad uwei na ka HSPDP u bah Renikton Lyngdoh Tongkhar MLA ka Mawkyrwat.
La ïoh jingtip ruh ba na kitei ki san ngut hi, lai ngut ki dei kiba la pyntikna pura ba kin ïakhun beit na ka party ha u 2023 katba ki arngut kiwei pat ka jingïakren ka dang ïaid hapdeng ki nongïalam jong ka party bad kitei ki MLA.
“Ka jingïakren mynta ka dang ïaid bad lehse hadien katto katne por ngin sa lah ban ai ka jingtip kaba pura halor kane ka jingsyllok jongngi bad ki bor pynïaid jong ka party,” ong uwei na ki nongïalam jong kitei ki MLA.
Haba ïoh pat ban ïa kren bad ki nongïalam jong ka UDP na ka constituency ba kitei ki MLA ki pan tiket, la ïathuh ba tad haduh mynta hi katei ka jingïakren ka dang long beit bad ki nongïalam ba halor duh jongka party.
La ïoh jingtip ruh ba ki don bun ki MLA barim na kiwei ki party kynthup ïa u Myntri barim ka tnad Kam pohïing ka Jylla, Bah HDR Lyngdoh kiba la pynkhreh mynta ban pynïasoh noh shen sha ka UDP.