Ka Sorkar ka dei ban da bishar bniah halor ka Reservation Policy khnang ban ym ktah shilliang: UDP

Shillong, Iaiong 9 : Ka United Democratic Party (UDP) ka la kyntu ïa ka sorkar ba kan bishar bniah sani bha ïa ka Reservation Policy bad wanrah ïa ka rai kaba pdiang bad mynjur lang da baroh bad kaba ym ktah shilliang ïano ïano ruh.
Ka UDP ka la pynpaw ïa kane hadien ba la mih ki jingdawa ba dei ban khot noh ïa ka Dorbar ba kyrpang ban ïatai halor ka jingpyntreikam ïa u snem na ka bynta ka Roster System jong ka Reservation Policy.
Na ka liang u General Secretary ka UDP u Dr Jemino mawthoh u la ong ba kam don kano kano ka jingpher na ka jingbishar bniah biang ïa ka Reservation Policy namar ïa kane ka Reservation Policy ym shym la bishar ne jurip bniah mynta la 50 tylli ki snem namar kat kum ki kyndon dei ban bishar bniah ïa kane ka polisi shisen man la ka 10 snem.
U la ong da ka jingdon ka Roster System ka dei ban don ka jingbishar bniah ba kan ym ktah shilliang ne noh shilliang hynrei ba kan long mar katjuh khamtam lada ka sorkar ka wanrah da ka formula kaba lah ban pdiang bad mynjur lang da baroh khlem da ktah ïa kano kano ka jaidbynriew hapoh ka jylla.
“ Kumta kam don kano kano ka jingpher lada ïakren bad ïatai bniah ïa kane ka Polisi la ka dei hapoh ka ïing Dorbar Thawaiñ lane shabar jongka ïing Dorbar Thawaiñ ruh khnang ba ki paidbah ruh kin ïa sngewthuh jingmut halor ka Reservation Policy bad ka Roster System” ong u Dr Jemino.
U la ong “ Ngim dei ban shah ïalam ne synshar ha ka bor jingsngew hynrei ngi dei ban long kiba ïatei bad ïohi jngai. Ngi donkam ban ïa sngewthuh jingmut lang khlem da ktah ïano ïano ruh khnang ba kan ïalong mar katjuh bad kam dei ban ktah ïa ka jingsngew jongno jongo ruh”.
Na kata ka daw u la ong “ Katba dang ïakren, ïa phylliew jingmut bad ïatai katta ngin ïoh bun ki jingai jingmut kiba tei ban ïa sngewthuh jingmut lang bad kumno ban pynbeit ïa kane ka jingeh kaba don hakhmat”.
U la ïathuh ba ka UDP ka la ïakren bad ïatai bha halor kane ka Polisi wat naduh shwa ka election ba ka la donkam ban bishar bniah biang ïa ka Reservation Policy jongka jylla bad na kata ka daw ïa kane ka mat la kynthup ruh ha ka manifesto jongka party.
U laong ba ki la don kiba ai jingmut ruh ba ka Roster System kam dei ban long naduh kaba sdang kata naduh 1972 hynrei ka dei ban long nangne shakhmat.
“ Na kata ka daw ia kane ka mat donkam ban ïatai sani bha khnang ban wanrah da ka formula kaba pynhun lut ïa baroh. Namar lada phi ong ïa ka Roster dei ban pyntreikam naduh u snem 1972 kan don ka jingktah bad jingsngew jong kiba bun kumta donkam ban ïapyrkhat sani bha ban wanrah da ka rai kaba pdiang bad mynjur da baroh” ong u Dr Jemino.
U la ong donkam ruh ban ïaid da ka lynti kaba jai jai haba bishar ïa kane ka polisi bad kumta u la ong “ To ngin ïa phai sha kiei kiei kiba tei bad kiba myntoi bad kaei kaba bha tam kaba ngi lah ban shim rai kum ka sorkar, kum ka jylla bad kum ki nongshongshnong jongka”.