Shillong, Ïaïong 07: Ka Voice of the People Party (VPP) ha ka sngi Palei ka la leit ban aiti ïa ka shithi sha u Myntri Rangbah ka jylla ban dawa ban pynlong ïa ka dorbar kyrpang na ka bynta ban ïoh ïatai ïa ka Reservation Policy bad ka Roster System.
Haba kren sha ki lad pathai khubor u General Secretary ka party u Dr Ricky AJ Syngkon u la ïathuh ba kum ka party ka kwah ba ki nongthaw aiñ kin ïoh ban ïatai sani ha kaba ïadei bad kane ka mat khnang ban lah ban shim ïa ki sienjam ba dei biang ha kaba ïadei bad kine ki ar tylli ki mat khamtam hadien ba ka High Court (HC) ka la bynshet ïa ka jingwanrah ïa ka Policy ha kaba ïadei bad ka Roster System sha ka ïingdorbar bad ka sorkar.
“Ban shna ïa ki policy ka dei ka kamram jong ka Ïingdorbar bad ka Sorkar na kata ka daw na ka liang ka kashari ka ieh ïa kane ka mat ha kine ki ar tylli kiba dei hok ban peit,” ong ka hukum ka HC haba pyndam noh ïa ka PIL kaba la ujor na bynta ka jingpyntreikam ïa ka Roster ha kaba ka VPP ka la sot ha ka dorkhas sha u Myntri Rangbah.
U la ïathuh ruh ba kane ka sienjam kaba ka VPP ka shim ban dawa dorbar kyrpang ka dei tang ka sienjam kaba nyngkong eh ha kaba ïadei bad kane ka mat jong ka Reservation Policy bad ka Roster System.
Haba kylli la ka ka la shim ne em ki sienjam ban ïakren bad ki paralok ba don ha ka Liang Pyrshah ban pynbor ïa ka sorkar ban khot dorbar kyrpang na ka liang jong u u la ïathuh ba kane ka dei ka sienjam kaba mynta ka dei beit tang jong ka VPP bad ong ba na ka liang ka party kan sa peit lada ka donkam ban khot ïa kiwei ki party ban pynjur ïa ka jingdawa ban khot Dorbar.
Lah ban kdew hangne ba ha ka sngi Nyngkong ka High Court of Meghalaya haba shim bishar ïa ka PIL jong u Greneth Sangma, ka ïingbishar jong u Chief Justice Sanjib Banerjee bad u Justice W. Diengdoh ka la ong ba kadei kamram jong ka Assembly bad ka sorkar ban ïakren bad ïatai halor ka Roster System bad kam shym la buh kano kano kano ka por ban pyntreikam ïa ka. “Hynrei ka paw ba ka Assembly kam pat shim ïakren ne shim kano kano ka rai halor kane”, la ong ka ïingbishar.
Ka ïingbishar ka la ong ruh ba kadei ka jingtreikam jong ka sorkar lane ka polisi treikam jong ka ba kan shim ïa ka rai haduh katno ka lah ban ran shadien ban pyntreikam ïa kane ka System. Shuh shuh ka ïingbishar ka la shim bishar ïa kane lyngba ka suo moto dei hadien ba ka la lap ba ka Reservation Policy jong ka sorkar Meghalaya kam shym la don ka Roster System naduh ba la sdang pyntreikam ïa ka.
Shuh shuh ka ïingbishar ba hakhlieh duh jong ka jylla ka la ong ruh ba ka paw ïa kane ka kam la shu shim bad pyntreikam beit khlem da ïakren ïa ka jingdonkam bad ka jingktah jong ka. Ka la ong ruh ba ka jingujor PIL halor ka jingpyntreikam ïa ka Roster System ka paw ba kadei ka jingpyrshang ban pynjngut ïa ka um kaba la khih phaloh lypa bad dei namar kata ka daw dei ban pynduh noh ïa kane ka jingujor.
