Dawa ka Lympung ki Seng Kynthei ïa ka KHADC ban thaw noh da ki aiñ

Shillong, ïaïong, 04: Ka Lympung ki Seng Kynthei ka la dawa ïa ka Khasi Hills Autonomous District Council (KHADC) ba kan thaw noh da ki aiñ kiba ïahap katkum ka jingïaid jong ka por khnang ba ki kynthei kin ïohlad ban ïadon bynta lang ha ki jingpyrkhat kam hapoh ka Dorbar Shnong.
Ha ka jingïakynduh ïa u Chief Executive Member (CEM) u Bah Titostarwell Chyne ha ka 29 tarik, Lber, 2023 hapoh ka jingïalam jong ka President ka Kong T. Phanbuh, ka Lympung ki Seng Kynthei ka la aiti ïa ka dorkhas ban dawa ba ki Dorbar Shnong kin ailad noh ïa ki kynthei ruh ban ïadon bynta lang ha ki jingïapyrkhat kam pyrkhat jam bad ban ïa rai lang ïa kino kino ki jingdonkam hapoh shnong hapoh thaw khnang ba kino kino ki kam shnong kin long kiba ïaid beit ïaid ryntih da ka jingïatip lang kynthei bad shynrang.
Katkum u kyrwoh ba la phah da ka General Secretary ka Kong Tentiness Swer ka la ïathuh ba ka ka Lympung ki Seng Kynthei ka la phah ïa kane ka mat jingdawa sha ka District Council naduh u snem 2011.
“Wat naduh ki por mynshwa la don ki Dorbar Shnong kiba la ai bynta ïa ki kynthei hynrei kane kam pat long ryntih bad dei halor kane ka phang ngi kyrpad ïa ka KHADC ban thaw noh da ki aiñ kiba ïahap katkum ka jingïaid jong ka por namarba ki seng kynthei ne ki seng longkmie ki ju long borabor kiba ai ïa ka kti ka mon ka kti ka diang ban ïatreilang bad ki Dorbar Shnong ha baroh ki liang,” ong u kyrwoh.