Tura, Iaiong 21 : Kawei ka longkmie ka la ujor syndon da ka ejahar ha Tura Police Station pyrshah ïa u kynum jong u Myntri Rangbah jylla u Conrad K Sangma uba kyrteng u Sanjay A Sangma da kaba ka la kynnoh ba ula shim kabu ïa ka jinglong myntri rangbah u kynum jongu ban buh syndon da ka light saw bad ka siren ha ka kali shimet jongu.
Kat kum ka ejahar ka la pynpaw ba ha ka 17 tarik mynta u bnai ka la leit sha Rongjeng ban leit ontep ïa iba haïing jongka bad haba la wanphai na Rongjeng bad poi ha Tura ha Chasingre ha ka por kumba 9.45 baje mynmiet la jia ka jingjur slap, leitlieh, phria bad pyrthat ba jur bha kumta la niah suki noh ïa ka kali ban lait na kino kino ki jingjia ba sngewsih. Ha kum katei ka por la wan kawei ka Toyota Fortuner kaba don u number ML 08 J 1974 kaba la niah sted bha bad pynpah da ka Siren bad pynmeh light saw bad knieh khmat ïa baroh ki kali kynthup ïa ka kali jongka.
“ Nga la ïohi ba kiba bun ki kali ki jynjar ban ïoh jaka kynthup ïa ka jongnga ruh ban kynriah sharud ban pyllait ïa katei ka kali pah Siren. Hynrei wat la katta ruh namar ma nga ba kiwei ki kali ki pyrkhat ba ka dei ka kali ki heh sorkar ne ki VVIP ki la kynriah beit sharud, kaba pynlyngngoh ïa nga ban tip ka long ba katei ka kali ka dei pynban ka jong u Sanjay A Sangma u kynum jong u Myntri Rangbah u bym shym long ei ei ruh ha ka sorkar hynrei tang u riew madan. Hynrei u la shim kabu ban pyndonkam da ka Siren bad light saw ban ïaid baheh ha sor Tura. Kumta ngam banse ban ujor da ka ejahar halor kane ka jingpyndonkam bakla jongu ïaka Siren bad light saw kaba la shah ban pyndonkam tang ki VVIP kata kum u President, Vice President, Prime Minister, Chief Justice, Speaker Lok Sabha namar ka tnad Road Transport bad Highway jongka sorkar pdeng ka la dep pynmih jingpynbna naduh ka 1 tarik Jymmang 2017 ha kaba la khang ban pyndonkam ïa ki light saw bad Siren ha ki kali shimet ne kali sorkar ruh lait noh tang ïa kitei ki heh ba la kdew haneng bad ki heh shipai haba ki leit sha kino kino ki kam ba kyrkieh. Wat ki myntri sorkar ruh kim lah shuh ban pyndonkam light saw. Kumta kane ka longkmie ka la kyntu ia ki bor pulit ban leh ïa kaba donkam kat kum ka aiñ kata ban rejister case bad tohkit bad pynshitom ïa u Sanjay kat kum ka aiñ ym ban leh shilliang khmat tang namar ba u dei u kynum jongu Myntri Rangbah ka jylla.
