Tura, Iaiong 21 : Namar ba don bun ngut kiba iap jyllop bad aksident ha ka jingleit bam khana lehkmen Easter ha ka Lah Sngi U Blei ba la dep ha ki bynta bapher bapher ka ri lum Garo, mynta ka sngi na ka liang u Deputy Commissioner ka West Garo Hills u Ram Singh ha ka jingïatrei lang bad ka Morthers’ Union, Tura ula lum da ka jingïalang ba kyrpang jong ki nongïalam Niam, ki Seng Bhalang, Council of Nokmas, ki Nonghikai ban ïakren bad ïamir jingmut halor kane ka kam kumno ban leh nangne shakhmat ban ym jia shuh kiba kum kine ki jingjia ba sngewsih.
Haba kren pynshai ha kane ka jingïalang na ka liang u DC u la ong ba kham mynshwa ruh u la ju lum ïa kaba kum kane ka jingïalang ban ïamir jingmut kumno ban khanglad ïa ka jingïaleh shongshit palat pud jong ki khun samla khamtam da kaba leit ïa dih ïa bam sha ki jaka bam khana kiba buh pat ïa ka jingim jongki haka jingma kaba khraw kata khamtam sharud ki wah bah ha ri lum Garo.
Haba ïakren kumno ban khanglad ïak i samla ban lait na ki jingdih buaid, u DC ula pynpaw ba donkam ban don noh ki jaka jngi, ki jaka ïalehikai ha kaba ki samla kin ïoh ban pynlut ïa ka por bad u la kyntu ruh ïaki kmie ki kpa ban peit bad sneng bha ïa la ki jong ki khun ki kti.
Ka President jongka Mothers’ Union ka la pynpaw ka jingsngewdiaw da kaba ong “ Balei ki khun samla ki long kumne mynta kim i hun shuh kata ka jingim bad ka la ong ba kine ki jingjia iap jyllop ha ki bynta bapher bapher ka la dei ban pynpeit mat lut ïa baroh. Ka pan ïa ka jingïatrei lang na baroh khnang ba kum kine ki jingjia kin ym jia shuh. Ka ruh ka la pynpaw ba ka sngewïahap bad ka jingkren jongu DC ba dang donkam ban don ki jaka ïalehkai khnang ba ki samla kin iïh ban pynlut por bad lait na ki jingdih buaid.
Ha kane ka jingïalang bun ki la ai ïa ki jingmut bapher bapher kum ka jingthaw da ki committee ban peitngor bad bud dien ïa ki khynnah skul bad ki shnong ki thaw, ban peitngor ïa ka jingiai jyllei ki dukan kyiad, ki Nokma bad ki bor synshar shnong ba kin shim khia ban pyrkhing ïa ka synshar ka khadar bad ter ter.
