Ka suk palat ban thied ïa ki nongïalam hynrei ka eh ban thied ïa u paidbah : Dr. Jemino Mawthoh

Shillong, Ïaïong 21 : U General Secretary ka UDP, Dr. Jemino Mawthoh u la ong ba ha ka saiñpyrthei ka long kaba suk palat ban thied ïa ki nongïalam hynrei kadei pat ka kam kaba eh bha ban thied ïa ki paidbah.
Haba kren ïa kane ha ka jingïalang jong ka UDP Mylliem kaba dang shu lah shen ha Lawsohtun, utei u heh UDP u la ong, “Lada maphi kum ki paidbah phi long kiba skhem ha ka jingmut jingpyrkhat nga ngeit ba ngin lah ban pynwandur ïa ka synshar khadar bad ka imlang sahlang bad ruh ban ïa kiew lang hiar lang ym ban kiew tang katto katne kumba long ki heh spah kiba kwah ban synshar ïa ka jylla.”
Nalorkata, u Dr. Jemino u la ong ruh ba lada ïa kren shaphang ka bor tyngka por elekshon ki paidbah ki dei ban sngewthuh ba kiei kiban ai ei ïa ka pisa lada kim ïoh jingmyntoi ïalade. “Lada ki ai ïaphi 500 kamut kin ïoh ïalade 5000 tyngka bad lada ki ai pat ïaphi 1000 kamut kin ïoh ïalade 10,000 tyngka. Hynrei dei pat ban sngewthuh ba kane ka kam synshar khadar kam dei satia ka kam ban pynlong kam business,” u la bynrap shuh shuh.
Kawei pat ka mat kaba utei u rangbah u kyntu ka long ba ha kane ka juk ba ka bor pisa ka trei borbah bha ha ka por elekshon, ki paidbah ki dei ban husiar bad sngewthuh ba ka pisa ba ki ïoh kam dei satia ba la ai ïa ki da ka jingieid ban ïarap namar ki don ha ka jingduk jingshitom hynrei kadei namar kadei ban shim kabu ïa ka jingduk bad ki jingeh ba ki kynduh.
“Don ruh kiba ong ba ka party jongngi ka kut tang ha Khanapara, hynrei nga ïalade nga sngew ba tang ha Khanapara ka la biang ïangi ban synshar. Peit ka Congress kaba ju kren ba ngim ïa tylli bad ba ngi kut tang ha Khanapara mynta pat de haei ïalade ka don bad ki MLA jong ka shaei ki la poi baroh,” u la bynrap biang.
Shuh shuh u ong ruh ba ki don ki MLA watla ki don mynta ha ki party bapher bapher kum ha ka Congress, TMC lane ki MLA shimet hynrei mynta ki la sdang ban sngewthuh ïa ka jingïatylli bad kumta ki la phai khmat sha ka UDP. U ong ruh ba kum ka party ki ïohi ïa ki dak ki shin ba ki la kham noh ka tarajur sha ka party UDP.
“Ban pynïatylli ka long kaba eh, bad ngi la ju ïohsngew ruh ba ki party rithor kum ka Congress, BJP, NPP bad kumta ter ter ki ju ong ba ki party riewlum kim ju ïa tylli. Hynrei kata ka jingkren kadei kaba bakla namar ka jingiatyli kam dei eh ha ka lama ba ngi don hynrei kadei eh ha ka jingmut jingpyrkhat jongngi.
U ong ruh ba lada ïa kren halor katei ka phang, ki don bun ki sengbhalang bad ki kynhun niam kiba don ha ka jylla hynrei kam dei satia ka kam kaba suk ban pynïatylli ïa ki baroh watla ka thong treikam jong ki baroh ka long kumjuh, kata ban shakri.
La pynkynmaw ruh ba ha ka por ba don ka jingïakhih Village Administration Bill, ki kynhun bapher bapher ki la tuid ban poi sha madan Polo namar ki sngewthuh ïa ka dor ka jingïatylli bad ka jingdonkam ban don lang kajuh ka rukom pyrkhat.