Shillong, ïaïong, 21: Ki samla pule hapoh ka jylla mynta ki don hapdeng ka jinglynga mynsiem hadien ba ka skulbah North Eastern Hill University, Shillong kam pat ai jingpynshai satia lyngba ka Websitte ha kaba ïadei bad ka jingpyntreikam ïa ka Common University Entrance Test (CUET)-2022.
Ka Khasi Students Union NEHU Unit ha ka sngi Palei ka la phah da ka dorkhas sha uVice Chancellor jong ka North Eastern Hill University (NEHU) Shillong ban pan jingpynshai halor ka jingbym pat ai jingpynshai ha ka Website ïa ka CUET katkum ba la bthah da ka University Grant Commission (UGC) khnang ba ki samla pule kin ïoh jied ïa ki jaka pule kiba don ha kylleng jong ka ri India baroh kawei katkum ka jingkwah ka jong ki.
U President ka KSU, NEHU Unit, u samla Banlumlang Rani ha ka jingïakren bad ki lad pathai khubor u la ong, “haduh mynta ka NEHU kam pat ai jingpynshai satia ha kaba ïadei bad ka jingpynlong ïa kane ka eksamin rung klas ha ka kyrdan Post Graduate (PG) bad Under Graduate (UG).
Ka jingbym pat ai jingpynshai jong ka NEHU lyngba ka Website ka la pynlynga mynsiem ïa ki samla pule, la ong une u nongïalam ka Seng.
“Ngi kyrpad ïa ki bor pynïaid jong ka NEHU ban ai jingpynshai noh mardor khnang ban weng ïa ka jingeh jong ki samla pule,” u la ong.
Ha kajuh ka por ka seng ka la dawa ïa ki bor pynïaid jong ka NEHU ban weng noh ïa ka jingpynbna ba ki samla pule kiba la wanphai na ki shnong bapher bapher sha ki jaka sah ha Hostel ki dei ban wanrah ïa ka RTCPR Test.
“Kumno ka NEHU ka pyntreikam ïa kane ka jingpynbna haba ïa ka klas la pynlong haduh shispah na ka shispah. Hato yn ïabit COVID-19 tang kiba sah hapoh Hostel?” la kynthoh une u nongïalam ka Seng.
Nalor kata ka seng ka la dawa ïa ki bor pynïaid ba ki dei ban shna pynbha noh ïa ka Bamboo Huts Cluster khnang ban pynsuk ïa ki samla pule bad ban pynbiang ïa ki Bos kiba ju leit shaw bad leit on ïa ki samla pule manla ka sngi namar kumba ka long mynta ki samla pule hapoh NEHU ki mad jingeh na ka jingduna shaba palat jong ki Bos.
