Pynkhlaiñ ka NPYF da ki nongïalam ba pura ha Ri Bhoi na ka bynta ka election 2023

Nongpoh, Ïaiong 21: Kum shi bynta ban pynkhlaiñ ïa ka party bad kum ka jingpynkhreh na ka bynta ka election 2023 hapoh ka jylla na Ri Bhoi District, ka National People’s Youth Front mynta ka sngi ka la lah ban pynskhem noh da ki nongïalam ba pura ka National People’s Youth Front ka Ri Bhoi District kaba dei hadien ba la dep ban jied ïa ki Nongïalam ba shim ïa ka lyngkor kum kita ki nongïalam ha ka lama jong ka NYPF kaba dei ka kynhun nongïalam ki samla na ka shnat treikam ka NPP ba la tip kum ka NPYF.
Ïa kine ki nongïalam ba pura ka NPYF Ri Bhoi District la pynskhem da u State President ka NPYF, u Samla Kitbor Nongrem ha ka jingïalang kaba la long mynta ka sngi ha Parish Hall, Nongpoh ha Ri Bhoi District.
Haba pynskhem ïa kine ki nongïalam ka NPYF Ri Bhoi District la don ryngkat ruh naduh u MLA ka Jirang, u Bah Sosthenes Sohtun, u MDC ka Jirang, u Bah Victor Rani, ka MDC ka Umsning, ka Kong Macdalyne S. Mawlong, u Bah Rayonald Kharkamni, u District President ka NPP na Ri Bhoi, u Babu Clement Mawlong bad kynthup kiwei kiwei ki nongïalam na ka NPYF nad NPP na Ri Bhoi District.
Kitei ki nongïalam ba pura ka NPYF Ri Bhoi District ki kynthup ïa u president ba la jied ïa u Samla Pyndap Wahlang, Working President, Ridshansing Lyngdoh, Vice President, Lansius Syiemlieh, General Secretary, Pynbhalang Syiem, Albertus Lapang bad kiwei kiwei ki nongïalam ba la pynskhem da u State President ka NPYF, u Samla Kitbor Nongrum.
Haba kren ha kane ka sngi, naduh u MLA ka Jirang, u Bah Sosthenes Sohtun, ki MDC ka Kong Macdalyne S. Mawlong bad u Bah Victor Rani bad kynthup ruh u President ka NPYF na Ri Bhoi, u Samla Pyndaplang Wahlang nad u State President ka NPYF, u Samla Kitbor Nongrem, ki la pynpaw ba ka NPP Party ka don ïa ka thong ban ioh ka jingsynshar ba marwei ha ka election 2023 hapoh ka jylla, namar bun na ki paidbah ki la phai khmat ïa kane ka party kaba la ithuh da ka election Commissioner ka Ri India bad kaba la tip ruh kum kata ka National Party kaba long ka jingsarong ïa ka jylla ba na Jylla Meghalaya la suit la shor ïa kane ka party da u (L) Purno A. Sangma, myntri rangbah barim ka jylla.
Na ka liang kine ki nongmihkhmat naduh u MLA bad ki MDC bad kynthup kitei ki nongïalam ki samla lyngba ka lama ka NPYF kin trei shitom ha Ri Bhoi bad kin buh ruh ka thong ban pynjop don burom ïa ki kyrtong ka NPP ha kane ka election 2023 na ki 5 tylli ki Constituency ha Ri Bhoi District.
Shuh shuh, ki la shim ruh ka rai ym tang ban trei na ka bynta ban pynjop ïa ki kyrtong ka NPP, hynrei kum ki samla ha ka lama ka NPYF kin don bynta ruh ban ai ka jingshakri kaba paka tam na ka bynta ka imlang ka sahlang bad ruh ban kyntiew ïa ka bha ka miat bad ka roi ka par ki padibah ha Ri Bhoi bad ha ka jylla hi baroh kawei.