Nongpoh, Ïaiong 21: Ki samla ka them Ri bhoi kiba la pass ïaka examination MTET ki la pynpaw ïaka jing sngewdiaw kaba khraw halro ka jingpynslem ka sorkar jylla ban khot interview naka bynta ki posts Nonghikai kiba dang sah thylli haduh mynta ha Ri Bhoi District bad ki la pynpaw ruh ba kum ki samla kiba ym donkam don jam hadien ba ki la pyndep ïa ka MTET ki angnud ba ka sorkar jylla lyngba ka tnad education kin thungkam noh ïa kito ki samla ba la pyndep ïa ka MTET ha ki post nonghikai bapher bapher ha Ri Bhoi.
Kumba la pynpaw da ki samala ba la pyndep ïa ka MTET na R Bhoi District, ki la ong ba ba bun ki skul kiba kynduh jingeh namar ka jingduna ki nonghikai, katkum ka jingthmu ka education policy, khamtam ïaki khynnah skul kiba dei ban ioh ïaki jinghikai kiba biang bad namar ka jingbym don nonghikai kane ka la ktah jur ïa ki khynnah skul kiba wan pule sha ki skul.
Ki la ong ruh ba kane ka jingpynslem ban khot ïa ka interview kan ktah ruh shibun khamtam naka bynta kito kiba la heh ka rta, kiba la jan palat ïaka rta thungkam(overage), kiba don ka lad sa tang ha une u snem bad lada ka sorkar ka dang pynslem ban khot ïa ka interview kane ka jingpyndep ïa ka MTET kam don jingmut shuh haba la kut ka rta ban wad kam wad jam.
Ban ïa kren halor kane ka jingeh kito kiba la pyndep ïa ka MTET, ki samla ki la pynlong ruh ïa ka jingïakynduh jong baroh kiba la pyndep ïa ka MTET ha Ri Bhoi District ha ka 26 tarik u Lber 2022 bad ha ka 2 tarik u Ïaiong 2022 mynta u snem ban ïa pyrkhat halor kane ka bynta bad bun na ki samla kiba la pyndep ïa ka MTET ki la pynpaw ka jingsngewkhia kaba jur halor ka jingslem ka sorkar ban thungkam ne ban khot interview.
Ki la pyntip ruh namar ka jingslem ka sorkar ban khot interview ïa ki samla ba la pyndep ïa ka Mtet, na ka liang kane ka kynhun ki samla ki la lei tuh ban buh ïa ka jingthoh haka 6 tarik u Ïaiong 2022 sha ka ophis u Director of School Education and Literacy ban kyrpad ïaka sorkar ban pynkloi noh katba lah ban thung kam noh ïaki nonghikai naka bynta ki posts kiba dang long thylli bad kumba long haduh mynta ym pat ioh ïa kano kano ka jubab naka sorkar. Shuh shuh, ki la pynpaw ruh ba da lei lei ruh kim sngewhun, ïaka kane ka jingleh mutlop ka sorkar bad lada ka sorkar kam ban leh ei ei bad kum ki samla ba la pyndep ïa ka MTET kim banse ban mih shakhmat ban dawa ïa la ka jong ka hok.
