Nongpoh, Ïaiong 21: Hadien ka jingeh bad ka jingjynjar bala mad da ki khynnah skul bad ki nong hikai halor ka jingjot rathai bad ka jingkhapngiah jong ka Sohkwai Govt. LP School, katei ka skul kan sa ioh syndon da ka iing skul baba paka ban sa tei haka shnong Sohkhwai haka jinglut kaba la kot kumba 37 lakh hadien ba u MLA ka Nongpoh u Bah Mayral Born Syiem mynta ka sngi u la leit ban buh ïa u mawnongrim ban tei ïaka skul building ba thymmai.
La sakhi ruh ha katei ka sngi da ka jingdonlang u Bah Balajied Ranee MDC, Bah R Dhar SDSEO Ri-Bhoi District, Bah Vincent Niang lang, ki nongïalam shnong.
Naka liang u Bah Mayral Born Syiem MLA ka Nongpoh haba kren ha katei ka sngi u la pynpaw ka jingsngewkmen kaba khraw bad ka long ka jingkyrkhu ïaka shnong Sohkhwai hadien ba ka sorkar lyngba ka tnad pule puthi kala mang ïa katei ka skhim ba kyrpang ha katei ka shnong ban tei da ka iing skul ba thymmai naka bynta ban dang pyntyllun ïaka jingshakri ban pynphriang ïaka jingnang jingstad ha katei ka thaiñ.
U la ong ruh ba ka shnong Sohkhwai ka dei kaba donbok ban ioh ïa katei ka skhim ba kyrmen ba katei ka skul kan long ka sharak sha ki heprit ha katei ka shnong ban ioh ïaka jingnang jingstad bad ka jinghikai ba kin san haka akor ka burom naka bynta ka lawei ba phyrnai jong ka dong bad ka thaiñ.
