Shillong, Lber, 22: Ka Seng Khasi, Kmie, Mawkhar, Shillong ha ka sngi Balang ka la pyndep ïa ka bynta ba kongsan shwa ban kan pynkhreh pynkhrum ban pynlong ïa ka Shad Suk Mynsiem da kaba pyndep ïa ka nguh ka dem, ka khnong ka bishar, na ka bynta ka Kiew Ksing.
Kaei ka kiew ksing? Lehse ka dei ka byrta ka shula ne ka jingpynbna ïar sha ki parakur para kha ka Bri Hynñiewtrep Hynñiewskum ba ka por ka samoi ban pynlong ïa ka shad ban ainguh aidem ïa U Blei Trai Kynrad kane ka la poi na ka bynta ban khreh ban sei ïa ki riam ka beit ka ksiar ka rupa na ka bynta ban ïoh pynriam ïa la ki nongshad kynthei bad shynrang, khnang ba kin ïoh ban ïamih lympung bad ban shad hun bad palei ka mynsiem.
Haba phai sha ka Kiew Ksing, ïa ka jingïalang baroh kawei la pynïaid da u Rgh Rangpher Rynjah dkhot JPK, la ïoh ïa ka jingkren maitphang na u Rgh O. Pyngrope Vice President ka Seng Khasi Kmie.
Hadien kane, ka kynhun u Tymmen U San Seng Khasi Kmie hapoh ka jingïalam u Vice Chairman u Rgh Donbokstar Kurkalang, u la leit sha ka nguh ka dem ka khnong ka bishar, da ka lengbah ka lengsan, u khaw eh u khaw kheiñ, ban khmih ïa kita ki dak ki shin ba kumba, ban ïa pan na U Blei Trai Kynrad ba naduh ka ka sngi ba la pynkhreh, ba ki kam ki jam kin da ïaid beit kin da ïaid ryntih, ba ka shad ka kmen kan da phuh kan da phieng, ba u duhalia un da ïoh ïa ka buit ka bor ba un lah ban tem ban put khlem da shoh thait shoh jrem, pynban ba ka sur jong ka ksing, ka tangmuri ka kynshaw kin da sawa da ka sur ba bang ba thiang, kaban pynshoh ïa ka met ka phad ïa ki rang bad ki thei sotti haba ki mih ban iuh kjat ban shad ha lympung.
U Tymmen U San u da ieng ruh ban ïasaid ïathew hakhmat U Blei Trai Kynrad ba Un ri Un sumar Un sukher, ba ïoh don ka sabuit ka sakai, u apthap, ki nong bishni ki nong pihuiñ, kiba thew bad sylla narud nakiar, ba ïa kum kine ki jingmut ba sniew bym lah ban ïohsngew da la ki jong ki shkor ne ban ïohi da la ki jong ki khmat, U Blei Trai Kynrad hi Un pynthiah lyngdang pynthiah pyllup ïa kum kine kiei kiei baroh.
Hadien kane nguh ka dem ka peit dak ka peit shin bad haba la biang lut nadong shadong, ki Duhalia ki la sdang ban tem ïa ka ksing lumpaid bad bynrap lang da ka jingtem sa ïa kiwei pat ki skit kiba don baroh 7 tylli.
Naduh kane ka sngi ba la pynkiew ïa ka ksing, manla ka janmiet kan don ka jingtem ïa ka Ksing bad ruh ban hikai shad ïa ki khynnah, ki samla kynthei bad shynrang ha Seng Khasi Hall, ka ban ïai bteng haduh ka janmiet jong ka 7 tarik, Ïaiong kaba long shi sngi shwa jong ka Shad Nohkjat ka ban long ha ka 8 tarik, Ïaiong, 2023.
