Shillong, Lber : Ha ka 21 tarik mynta u bnai ka tnat Agriculture Insurance Co. Of India ka la pynlong ïa ka prokram Sam Polisi sha ki nongrep kiba la leh ïa ka insurance hapoh jong Ka National Crop insurance program -PMFBY Rabi 2022-23 ha ka jingïalang ba la pynlong hapoh U Tirot Sing Memorial Hall ,Pyndengumiong, Mairang, Eastern West Khasi Hills, Meghalaya.
Lyngba jong kane ka program ka la don ki jingbatai halor ki jingmyntoi hapoh jong ka PMFBYkaba la ai jingkyrmen ïa ki nongrep ki ba la leh ïa kane ka skhim. I Director jong Ka Agriculture, I Kong S Kharsati I la long I kongsan jong katei ka program.I Director I la ai mynsiem shuh ïa kiwei pat ki nongrep ki bym pat shim la pynrung ne enroll ïa lade ba kin sdang noh naduh ka aïom lyiur ka ban sa wan da kaba register ïalade hapoh kane ka skhim ka ban ïada ïa ki nongrep na ki jingduh ha ka rep ka riang lyngba ka jingshah pynjulor ha ki bor ka mariang ïa kiba ngim lah ban ïohi ne batai lypa.
Ryngkat bad I Director, kiwei ki ophisar na ka Department jong ka Agriculture- Monitering bad Evaluation Officer; Research Officer (Statistics) , ha ryngkat I Branch Manager jong ka Meghalaya Rural Bank , Mairang ki la don lang ha katei ka prokram.
Ha kane ka jingïalang la pynsngewthuh ïa ki nongrep shaphang ka rukom ban register, ki jingmyntoi hapoh jong kane ka skhim, ki lad ban pyntip lada wan ki jingjulor na ki bor mariang khnang ba kin lah ban ïoh ïa ka insurance jong ki bad kumta ter ter. Ka bynta treikam jong ki bank, ki CSC bad ki jingsiew kiba ki nongrep ki hap ban siew (premium) ruh la batai ha katei ka program.
Ha kane ka prokram la sakhi ïa kiba bun ki nongrep kiba la wan ïashim bynta bad kiba la pynpaw ruh ïa ka jinglong la kloi ka jong ki ban register hapoh kane ka skhim ha kane ka aïom lyiur ka ban wan mynta u snem 2023.
La pynkut noh ïa kane ka prokram da ka jingsam polisi sha ki 60 ngut ki nongrep da I kongsan.Kine ki nongrep kiba la leh insurance na Myriaw bad Mairang mynta ki lah ban ong da ka jingsarong, “Ka Polisi Jong Nga Ha Ki Kti Jong Nga.”
