Nongstoiñ, Lber, 15: Katba ngi dang jam sha ka juk kaba shai ïa kaba ngi ong ruh “ka Ïa jong ki kor ki bor” ne ka Generation of Technology, phewse ka pyrkhat pyrdaiñ jong ki nongshong shnong ka dang sah kumjuh bad ym don ba burom ïa ka Mei Mariang lane ban buh ïa ka jingleh khuid hakhmat, kat haduh ba la i sangsot bad i saitmet ban khmih ïa ka jinglong jingman jong ki wah khamtam kiba don ha sor Nongstoiñ.
Haba peit ïa ka jinglong jingman jong kitei ki ar tylli ki wah kiba don ha sor Nongstoiñ, la ïohi ba kitei ki wah katba nang wan ki sngi ki por ki la nang kham jaboh bad kham jaboh shuh shuh. Ka daw ka dei beit namar ka jingbret pathar ïa ki jaboh jabaiñ kynthup naduh ki bilor kyiad, ki plastic bad kiwei kiwei.
Ka Nongstoiñ ka lah dei kawei na ki sor kaba la kham paw ha ka jylla bad ka dei ruh ka Nongbah jong ka West Khasi Hills District. Hynrei, ym pat don wat tang kawei ruh ka jaka pynlang ñiut ha man la ki kyntoid jong ka sor Nongstoiñ. Toi na ka liang ka Nongstoiñ Town Committee ha ki snem ba kham mynshwa, ka la pyrshang ban buh ha man ki jaka, hynrei ym don ba burom bad baroh ki shim kabu pynban ïa kitei ki jaka lum niut, da kaba bret pathar ïa ki ñiut ba dei ban buh bad ki bym dei ban buh.
U bah Armandstar Marweiñ u ba dei uwei na ki nongshong shnong jong ka sor Nongstoiñ u la ong, “Ha ka jingshisha ki briew kiba shong shnong ha sor Nongstoiñ ki dei kiba la nang la stad, hynrei ki leh ki kam kum ki briew kiba dang dum.”
Ka samla Banrisuklang Lyngkhoi kaba dei ka khynnah skul ka St.Francis D’Assisi Higher Secondary School Siejlieh, ka la ong ba ka dap da ka jingsngew lehraiñ haba ïohi ïa ka jingjaboh. Kumta, ka kyntu ba lada long kaba lah, ki paidbah ki dei ban burom bad lum ïa ki ñiut bad sa ai pat ha ki kali lum ñiut, ym ban shu bret pathar sha wah.
