La rakhe ïa ka sngi kyrpang jong ki nongtied nongpet ha South West Khasi Hills District

0

Mawkyrwat, Lber, 15: Ka ophis jong ka Deputy Commissioner (Supply), South West Khasi Hills District ka la ïoh ban rakhe ïa ka ‘World Consumer Right Day’ ne ‘ka sngi ba kyrpang jong ki Nongthied Nongpet’ halor ka phang, “Empowering consumers through Clean energy transition” kaba mut “Ka jingpynkupbor ïa ki nongthied nongpet ban pyndonkam noh da ki bording ba pynneh pynsah ïa ka Mariang” ba la pynlong ha Multipurpose Hall DC’s Office, Laitlawsang, South West Khasi Hills District.
Ha kane ka jingrakhe u bah T. Lyngwa, IAS, Deputy Commissioner, South West Khasi Hills District u la long kum u kongsan ha ryngkat ka jingïadonlang bad kiwei de ki ophisar sorkar jong ka South West Khasi Hills District.
Haba kren ha kane ka jingïalang u bah Lyngwa u la ong ba la rakhe ïa kane ka sngi ki nongthied ki nongpet ha shityllup ka pyrthei bad ha kaba ïa dei bad kane ka ri India ruh ka la buh ïa ki aiñ ki kanun ha kaba ïa dei bad ka jingïada halor ka hok jong ki nongthied nongpet da kaba buh da ki Consumer Forums ha kylleng ki distrik khnang ban pynsuk ïa ki nongthied nongpet ban pynpaw ïa ki jongsngew halor ka jjingbymhun bad ka jingbymbiang ha kaba iadei bad ki lad ai jingshakri bapher bapher.
Ha ka jingkren jong u u la pynsngewthuh ruh ba kum ki nongshong shnong ki don ka hok ban ujor lada ki ïoh ïa ki mar ki mata kiba sniew lane ki lad jingshakri ki bym biang ne ai jinghun ïa ki bad ki donkam ban pynsngewthuh paidbah khnang ba kin lait na ka jongshah thok bad shah shukor ha ki nongdie bad lada don kum kita ki don ka hok ban pynsngew da kaba ai ïa ki jingujor lyngba ka Consumer Forum na ka bynta ban weng ïa kiba kum kita ki jingeh.
Ha kaba ïadei bad kane ka program, ka kong Y.R. Mawlong, Additional Deputy Commissioner, South West Khasi Hills District, Mawkyrwat ka la ai ki jingpynshai paidbah halor ka hok jong ki nongthied nongpet bad ki kamram kiba u ne ka nongthied nongpet ki dei ban tip bad sngewthuh bad ban kynmaw ruh ba haba ki leit ha ki dukan kim dei ban klet ban peit ïa ki tarik bad ki snem ba la thoh ha ki mar lane kiwei kiwei ki lad jingshakri kiba lah ban long ka jingma ne ktah ïa ka koit ka khiah.
Ha kajuh ka por ka la pynkynmaw ba ka phang pdeng jong mynta u snem ka long halor ka jingpynkup bor ïa ki nongthied nongpet da kaba pyndonkam noh da ki bor dong kaba lah ban pynneh pynsah bad ba lait na ka jingpynjaboh ïa ka mei mariang.
U bah K.T. Nongsteng, EAC, South West Khasi Hills District ha ka jingkren jong u u la ong ba kum ki nongthied nongpet ngi don ka hok ban lait na ki jingma (Right to Safety), ka hok ban ioh jingtip (Right to be Informed), ka hok ban jied (Right to Choose), bad ka hok ban pynsngew halor ka jingbym hun ïa kano kaba ki thied ne ka lad jingshakri ba ki ïoh bad ka hok ban ïoh jingpynshai (Right to Awareness) da kaba kyntu ruh ban rah lem ïa kane ka khubor sha kiwei khnang ba kan long ka jingïarap na ka bynta ki ong ki ha kane ka bynta.
U bah L.T. Tariang, Additional Deputy Commissioner, South West Khasi Hills District u la pynïaid ïa ka jingïalang katba ka kong D. Basan, Inspector Supply, South West Khasi Hills District ka la pyllait da ki kyntien khublei.

Leave A Reply

Your email address will not be published.