Shillong, Ïaïong, 19: Ka Hynñiewtrep Integrated Territorial Organization (HITO) ha ka sngi Baar ka la ïakynduh ïa u Principal Secretary jong ka tnat Animal Husbandry and Veterinary u GHP Raju bad ban mudui pyrshah ïa ka jingjur shaba palat ka jingkhaii be-aiñ ïa ki masi bad ki muid na khappud ka jylla Meghalaya sha ka Ri Bangladesh.
Ha ka jingïakren bad ki lad pathai khubor, u President ka HITO u Bah Donbok Dkhar u la ong ba ka Seng na ka por sha ka por ka la ïoh ujor na ki riewpaidbah ba ki don ki briew kiba leh kum ki Dalal ban khaii be-aiñ ïa ki masi bad ïa ki muid sha ka ri Bangladesh da kaba pyndonkam bakla ïa ka Challans ba la ai da kane ka tnat treikam ka Sorkar kaba treikam tang hapoh u pud u sam jong ka jylla Meghalaya.
“Ngi la ïoh pdiang ïa ki jingujor shaphang ka jingdon jongki katto katne ki Dalal be-aiñ kiba ju khrong pisa na ki trok kiba don ïa ki Challan kiba biang kiba ju kit ïa ki masi ha shilynter surok,” ong u Bah Donbok Dkhar.
U Bah Donbok Dkhar u la ong ba ka Seng dang shen ka ladep ujor sha ki bor synshar ka East Khasi Hills District halor ka jingïai bteng kane ka jingkhaii be-aiñ ïa ki masi bad ki muid sha Bangladesh.
Ha kaba ïadei bad ka jingduna ïa ki Enforcement jong ka tnat AH &Vety, ka HITO ka la pynpaw hakhmat u Principal Secretary ba ka long kaba kloi ban ai ïa ki Volunteer ryngkat ka jingsiew ban talasi ïa ka jingjur shaba palat ka jingkhaii be-aiñ ïa ki masi bad ki muid ha kylleng ka jylla.
U la bynrap nalor ba ka Jylla ka la mad ïa ka jingduna ka doh masi na ka daw ka jingkhaii beaiñ sha Bangladesh, ka tnat
Animal Husbandry and Veterinary ka dei ban shimkhia ïa kane ka kam bad ban kem mardor ïa kiba donkti.
U Bah Dkhar u la ong shuh shuh, khnang ban ïada ïa ka jingkhaii be-aiñ ïa ki masi sha Bangladesh, ka tnat AH&Vety ka dei ban pyntip sha ka Sorkar Jylla ba kan shim ïa ka rai hapoh ka Ingdorbar Thawaiñ ka Jylla ban kyntu ïa ka Sorkar Pdeng ba kan ai jingbit noh ban khaii ïa ki Masi bad ki Muid na Meghalaya sha Bangladesh khnang ba kan long ruh ka jingaikam ïa ki paidbah bad ban kyntiew ïa ka jingpynmih khajna na ka bynta ka Sorkar Jylla bad ka Sorkar Pdeng.