Shillong, Ïaiong, 18: Ka Meghalaya Samagra Shiksha Abhiyan School Association (MSSASA) ha ka Lah Sngi U Blei ka la kyrpad ïa ka Sorkar Jylla ba kan pyllait noh ïa ka pisa kaba 4464.16 klur kaba dei ka Second Installment ïa kaba ladep pyllait da ka Sorkar Pdeng na ka bynta ban siew tulop ïa ki nonghikai skul SSA ha kane ka jylla Meghalaya.
U nongïalam jong ka MSSASA u Bah Aristotle Rymbai ha u kyrwoh ba la phah sha ki lad pathai khubor, u la kyrpad ïa ka Sorkar Jylla ba kan pyllait noh ïa kane ka pisa kaba dang sahkut haduh mynta hapoh ka Account jong ka tnat Pla Tyngka ka Sorkar Jylla khnang ban siew noh ïa ka tulop kaba dang sah sa lai bnai jong ki nonghikai skul SSA kiba la shu im kordit namar ka jingbym bïang shuh ïa ka jingïoh tulop kaba manla u bnai.
