Shillong, Ïaiong 18: U Symbud Myntri Rangbah ka Jylla Bah Prestone Tynsong hynne ka sngi nyngkong, ula kyntu ïa u Myntri Rangbah barim bad Nongïalam ka Liang Pyrshah Dr Mukul Sangma ba un sangeh ïa ka jingleh Politics halor ka kam ïapynbeit khappud.
“Nga sngew ba u LO u dei ban don ka jingkitkhlieh lem haba kren halor kane ka kam ym ban pynkulmar jingmut ïa ki nongshongshnong ka Jylla. Nga kynty ïa u ban sngewbha ban iasnohkti lang bad ka Sorkar. Nga sngew ba phi dei ban iaroh ïa kano kano ka rai lane ka MoU bala iasoi ym ban shu leh politics namar kane ka kam ka dei ka kam ïap kam im jong ka pateng ban wan” ong u Bah Prestone haba ïakren bad ki nongthoh khubor.
U Symbud Myntri Rangbah ula kynthoh ïa kane halor ka jingkynnoh jong u Dr Mukul Sangma ba ka Sorkar Meghalaya Democratic Alliance (MDA) ba ïalam da ka National Peoples Party (NPP) kala shah pynngop da kaba iasoi ïa ka soskular bad ka Assam ban pynbeit ïa ki 6 tylli ki jaka ba ïakajia napdeng ki 12 tylli.
U Bah Prestone ula ong ba ka Sorkar barim ba ïalam da u Dr Mukul Sangma ka dei ka sorkar kaba shim rai khlem ka jingtip lang jong ka Kynhun Myntri halor ka kam ïapynbeit pud bad kynnoh ba une u Myntri Rangbah barim ym ju sam lem ïa ki jingtip halor ki 12 tylli ki jaka ba ïakajia.
“U (Dr Mukul)la pynkhreh hi ïa baroh ki jnit ki jnat bad phah lut sha Assam. U dei ma u, uba leh ïa baroh. Watla nga donlang ha ka Sorkar ha katei ka por hynrei ngam ju ïoh jingtip ïa kita ki jaka ba don hapdeng ka jingïakajia” ong u Bah Prestone.
“Ha ka por ba u Dr Mukul u dang long Myntri Rangbah ka Jylla, ka Sorkar Jylla kala ithuh ba ki don tang 12 tylli ki jaka ba ïakajia bad halor kane, ka sorkar kala phah ïa ka thup kyrteng jong kine ki jaka sha Assam ha u snem 2011” ula bynrap.
Haba pynpaw ba ka Sorkar MDA ka ieng skhem halor ka thup bala aiti sha Assam ha u snem 2011, u Bah Prestone ula ong “Mynta ngi la poi ha ka khep ba ap satang ïa ka por ba ka Sorkar India lyngba ka Surver of India kan wan ban pynthikna khatduh ïa u pud u sam jong ka Meghalaya bad Assam, ka ban long shen”.
U Symbud Myntri Rangbah ula kren ruh halor ka kam jong ka Maikhuli bad buh jingkylli la u Dr Mukul Sangma ula leh aiu halor ka lum jingtip ba don ha kane ka shnong.
“Ka dei ka sorkar kaba leh …kumjuh ruh ka long ïa ka West Khasi Hills. Ha katei ka por, nga la ïathuh ha phi ba ki don katto katne ki jaka kiba la shim da ka Assam hynrei um ju kren eiei halor ki jingïakajia. Haba um shym la kren eiei ïa kine ki jaka, ka mut ba ma u hi ula pynbna ba kine ki jaka ki hap sha Assam hynrei balei pat mynta ba u kynnoh ïa ngi” ula ong haba buh jingkylli ïa u Nongïalam ka Liang Pyrshah ban kren hok ïa kane.
Ha kajuh ka por, u Bah Prestone ula kyntu ruh ïa baroh ki seng saiñ pyrthei ba kin kiar na ka jingleh politics halor ka kam ïapynbeit pud bad kumjuh ruh ïa ka kam pynkynriah ïa ka Them Metor na Them Iew Mawlong.
“Ki briew ki lah ban don la ki jong ki jingsngew hynrei nga sheptieng ba ka lah ban don ka jingbishni naba tang hapoh ka shisnem, ngi (MDA) la lah ban poi haduh une u khep. Nga sheptieng ba ki briew ki pyrkhat ïa ka politics. Namar kata, halor ka kam khappud bad Them Metor, nga kyntu ïa ki seng saiñ pyrthei ba kin kiar na ka jingpynlong kam politics” ula ong.
“Ka Sorkar MDA kam shym la leh politics eiei ruh em halor kine ki kam. Kaei kaba ngi leh ka dei namar ba ngi pyrkhat ïa ka pateng ban wan. Wat ong ba ngi shu rai kyrkieh naba la 50 tylli ki snem ym shym la don ba nud ban pyn beit ïa kane ka kam” ula ong.
Halor ka jingpyrshah ïa ka MoU, u Symbud Myntri Rangbah ula pynpaw ba um lah satia ban sngewthuh balei ba katto katne ki nongïalam kim sngewthuh ïa kane.
“Nga la ïohi ïa ka jingkren jong uwei u Nongïalam na ka Congress ba u Conrad Kongkal Sangma ula kamai da ki klur tyngka na kane ka soskular pynbeit pud. Kane ka dei ka kam khynnah, nga kyntu ïa ki Nongïalam ba shisha ba kin kiar na ka jingkren khynnah la kumba ka dei ka kam kaba suk ban shna pisa na ka kam khappud bad Them Metor. To ngin iatreilang bad ka Sorkar naba ngi don hangne na ka bynta ka Jylla bad ki paidbah la ka dei ka kam pynbeit pud lane ka Them Metor. Ngi la kut jingmut ban pynbeit ïa kine ki kam” ula ong.
