Ki don bun ki briew ha kine ki sngi kiba mynta kiba pyndap ïa ki kamra shongkai bad ki kamra thiah da ki jingthung kiba lah ban thung hapoh ïing bad kine ki jingmlien ki dei kiba khring shibun halor ka jingpaw jong ka jinglong itynnad jong kine ki kamra. Lait na kane ka jingbuh kine ki jingthung ka dei kaba lah ruh ban wallam ka jingmyntoi na ka bynta ka met, ka jabieng bad ka mynsiem bad lah ban im ka jingim kaba koit ba khiah.
Ka jingdon ki jingthung ka dei kaba lah ban wallam ka jingkylla ha ka kamra bad ym tang katta hynrei ka ai jingmyntoi ruh ha ka liang ka koit ka khiah. Lada phi ïohi kine ki jingmlien bad kwah ban leh hynrei dang don ki jingartatien ki don ki jingpynpaw kiba lah ban pynskhem ka jingmut jongphi.
Kine harum ki long ki jingmyntoi halor ka jingbuh kine ki jingthung ha ki kamra jongphi :
Ka jingpynkhuid ïaka lyer : Ki jingthung ba lah ban buh ha ki kamra ki dei kiba lah ban pynkhuid ïa ka lyer ba phi ring mynsiem. Ki jingthung la kam ba ki lah ban pynkhuid haduh 87% ki compound kiba jakhlia ha manla ka 24 kynta. Kine ki phlia jakhlia ki kynthup kum ki formaldehyde, benzene bad trichloroethylene bad ki dei kiba don ka rug, ki bag, ki tdem sikret bad kiwei de. Kine ki jingthung ne ki sla kiba buh ha la ïing ki dei kiba lah ban kjit ïaka carbon monoxide bad ki phlia jakhlia kum ki formaldehyde bad benzene. Ka jingbuh kine ki jingthung ne ki sla ka pynjur ruh ka jingdon ka oxygen namar kine ki pynmih ka oxygen hapdeng ki pyntyllun ïa ka kam jong ka photosynthesis. Kane ka ai jingmyntoi hapdeng ba ngi ring mynsiem.
Ka pynduna ki jingsawa ha la ïing : Ki don tang khyndiat lehse kiba tip ba ki jingthung ym tang ba ki lah ban pynduna halor ka jingshah ktah ba mih n aka lyer jaboh hynrei ki lah ruh ban pynduna ki jingsawa jam palat hapoh ïing. Kine ki jingthung ki dei kiba lah ban pynduna ki jingsawa khamtam hapoh ki ïingmaw. Ki sla ki dei kiba lah ban tan ka jingmih ka jingsawa bad pynlong ïa ka ïing bad ka jaka treikam jongphi kaba kham lah ban ai jingsuk hapdeng kito kiba don hapoh kine ki kamra.
Ka jingïarap halor ka jinglah ban pynleit jingmut : Ka jingbuh kine ki jingthung ne ki sla ha la ïing ne ki jaka treikam ka dei kaba lah ban ai jingmyntoi ym tang ha ka liang ka koit ka khiah bad ka jingitynnad ka ïing. Hynrei la kam ba ka dei kaba ïarap ruh halor ka jinglah ban pynleit jingmut bad pynlong smat.
Ka ai jingïada n aka jingsuhkhriat bad ka jinglong sat ka ryndang : Ki jingthung ne ki Sla ki dei kiba lah ban pynmih 97% ka lyer na kaei kaba ki pynmih. Lada phi buh kine ki jingthung ha ki kamra ki dei kiba ïarap ban wallam ka jinglong sngem ka kamra. Kane ka ïarap ban pynduna ki jingpang ba don jingïadei bad ka jingthut halor ka rukom ring mynsiem kum ka asthma, suhkhriat, ka jinglong sat ka ryndang, ka jingtyrkhong ka sniehdoh bad kiwei de ki jingshitom kiba wanjia n aka daw ka jinglong tyrkong. Ka jingjied kane ka lynti ba lah ban buh kine ki jingthung ha la ïing ka ïarap ban wallam ka jingim kaba tei, ka jingim kaba bha. Kine ki jingthung ba phi lah ban buh ha la ïing kum u aloe vera ruh ki dei kiba lah ban ai jingïarap lada phi mad ka jinglong tyrkhong.
Ka jingduna ka jingkhuslai bad ka jingbha ha baroh ki liang ka koit ka khiah : Ka jingbuh kine ki jingthung ka dei kaba lah ban ai jingmyntoi ha baroh ki liang ka bha ka miat jong ki briew. La shem ba kito ki briew kiba don ha ka jaka treikam ba don kine ki jingthung ki kham paw halor ka jinglah ban trei bha ïa ka kam, bad kham trei smat, bad long kiba kmen bad duna ban ngat ha kiba bun ki jingshitom haba ïanujor bad kito ki briew kiba trei ha ki jaka ba ym shym don ki jingthung.
