Bthah ka HC ban jubab ka KHADC halor ka hok ki kynthei ban jied bad ïakhun Rangbah Shnong

Shillong, Iaiong 17 : Ka ïing Bishar High Court ba don burom jongka jylla ka la bthah ïa ka Khasi Hills Autonomous District Council (KHADC) ban ai jubab shai halor ki nongrim ba ka ïeng na ka bynta ka hok ki kynthei halor ka jingïashim bynta ha ka election ban jied bad ïakhun Rangbah Shnong.
Halor kane ka ïing bishar ka la ai por ïa ka KHADC ban ai jubab hapoh saw taiew.
Ka KHADC kham mynshwa ka la pyntip sha ka Iing Bishar High Court ba ka dang bishar bniah ïa kane ka kam. Hynrei ka ïing Bishar ka la ong “ Lada ka long kaba lah la dei ban pynlong da ka referandum ne ban vote da ki paidbah halor kane ka mat khnang ba ki kynthei kin ïoh ïa ki hok jongki”.
ïa kane ka mukotduma la ujor da ka kong Aneeta Synrem pyrshah ïa ka Ain kaba khang lad ïa ki kynthei ban ïashim bynta ha ka election jied ne ïakhun ïa ka kam Rangbah Shnong.
Kat kum ka mukotduma la ujor pyrshah ruh ïa ka Khasi Hills Autonomous District Council ( Appointment and Succession of Syiem, Deputy Syiem Act 2007 bad ïa ki Rules ba la thaw ha u 2015. Namar kine ki aiñ ki la khang lad ïa ki kynthei ban ïashim bynta ha ki election ym tang ba kin ïoh ban ïajied Rangbah Shnong hynrei ban ym shah ba kin ïakhun ïa katei ka shuki ruh.
Na ka liang ka sorkar jylla bad ka KHADC ki la dep ai ka jubab ne affidavits sha ka ïing bishar hynrei mynta ka ïing bishar ka pan da ka jubab kaba shai kdar. Ka ïing Bishar kan shong bishar biang halor kane ka mukotduma ha ka 12 tarik Jymmang 2022.