Shillong, Iaiong 17 :U Nongaibuit jongka ka United Democratic Alliance (UDP) u bah Bindo M Lanong u la pynpaw ka jingbynniaw halor ka jingleh kyrkieh jong ka sorkar Meghalaya Democratic Alliance (MDA) ka ba la ïalam da u Conrad K Sangma kum u Myntri rangbah ban pyndep noh kloi kloi ïa ka jingpynbeit ïa u pud u sam na ka bynta ki 6 tylli ki jaka ki ba don ka jingïakajia hapdeng ka Assam bad Meghalaya.
“Ha ka jingïohi jong nga , nga ïohi ba ka sorkar MDA ka la shu leh kyrkieh ban pynbeit noh ïa kane ka kam kaba la sah teng la bun bun snem. Lada kiwei ki sorkar ba la dep kim lah ban pynbeit ïa u pud u sam, kumno kane ka sorkar MDA kan lah ban pynbeit noh tang hapdeng ka 6 bnai” la ong u bah Bindo sha ki lad pathai khubor.
U la bynrap ruh “Lada ki sorkar ba la dep ki kwah ban leh kyrkieh kum ba leh ka sorkar MDA , ïa kane ka kam la lah ban pynbeit naduh mynshuwa hynrei ka jingleh kyrkhieh ban pynbeit noh ïa u pud u sam da ka sorkar MDA ka ba la wanrah ka jingbym hun jong ki ba bun balang mynta”.
U bah Lanong u la ong ïa ka sorkar jylla ba kane ka jingleh kyrkieh jong ka sorkar MDA ka lah ban ktah shirta ïa ka jylla ,kumta na ka liang ka sorkar kam dei ban leh kyrkieh bad ka dei ruh ban bud ïa ka rukom ka ba shnong nia bad da ka lynti ka ban lah ban pdiang lang da baroh .
“Lada ka sorkar MDA mynta ka pynbeit ïa u pud u sam da ka lynti kaba don ka nongrim kaba shongnia, ki nongshong shnong ruh kin pdiang ïa kane hynrei lada pyrshang ban pynbeit ïa kane ka mat, tang ban ïoh pyndep noh bad tang ha ka jingsngew jong ki, kane kan ym lah ban ym pynhun lano lano ruh ïa u nongshong shnong ha ka jylla ” ong u bah Bindo.
U bah Lanong u la ong ruh ki Sorkar la ki dei ki ba la dep ne kaba mynta ki dei ban nang ban wad ïa ki lad ki lynti ban pynbeit ïa kane ka mat, namar ba kin shu shim rai tang ban ïa hun para sorkar kam long .
“Ban pynbeit hi ïa u pud u sam ka sorkar ka dei ban shimkhia ban shim ïa ka jingïasyllok na baroh ki mamla kiba kynthup lang ïa ki Hima bad ïa ki nongshong shnong na ki thaiñ khappud” u la bynrap shuh shuh.
Na ka liang u ne u nongïalam rangbah ha ka jylla u la kdew ruh ba kan long ruh kaba donkam ba ka sorkar kan wad ïa ka jinglong jingman jong u pud u sam naduh ba sdang ,bad kane ka dei tang ban don jingtip halor kane ka mat ba ki pyrshang ban pynbeit.
“Lada don ka jingtip ïa ki dulir naduh ba ka sdang wat la mynta ym lah shuh ban ïeng kat kum kine ki dulir kan don jingmut ban ïa kren, ïa kdew ïa dawa ïa la u pud u sam hynrei lada ym don ïa ka jingtip ruh yn ym lah ban ïa ktah ruh ïa kane ka bynta” la ong u bah Lanong.
U bah Lanong u la kdew ruh ïa ki katto katne ki nongrim ba ka sorkar jylla ka dei ban phai ki khmat jong ka ha ba ka ïaid ban pynbeit ïa u pud u sam ka ba nyngkong ka long ban peit ïa ki kot ki sla ki ba don, ka ba ar ka long ban ïasyllok bad ban sngap ïa ki nongshong shnong na ka jylla, bad ka ba lai ka long ba ki dei ban ïa kdew halor ki nongrim naduh ba sdang bad halor ka nongrim ba lah ban pdiang lang mynta.
“Ka Sorkar Jylla haba ka kwah ba ki paid nongsho9ng shnong kin pdiang ïa kane ka rai jong ki, ka dei ban shim ïa ka jingïamynjur lang jong ki Hima ki shnong ki thaw bad ki nongshong shnong , hynrei lada ki bor sorkar kim wad, kim thaw ,kim ïeng ha kine ki nongrim ban sngewthuh jingmut ,kane ka jingthmu ban pynbeit ïa u pud u sam ,wat la kin ïa shong pynbeit da ki phew snem ruh kan ym don jingmut”.
Ka jingïapynbeit ïa u pud u sam hapdeng ka sorkar Assam bad Meghalaya hadien ka 50 snem kan long ka ba jop lada ka sorkar kan shim khia ban ïa pynbeit lang sorkar para sorkar , bad kan dei ka kamram jong ka sorkar jylla ba kan shim khia ban kynjoh ktien ban pynsngewthuh, bad ki Hima ,ki shong ki thaw bad ki nongshnong shnong ha ka jylla.
“Ka sorkar ka dei ban shim ka jingkitkhlieh ban pynsngewthuh ïa ki nongshnong ha ka jylla ba lada ki kwah ba kane ka jingpynbeit u pud u sam kan ïeng kat kum ki kot ki sla naduh ki por mynshuwa, kane kan ym lah ban poi shaei ruh”. ong u bah Bindo.
