Bishar bniah biang ïa ka Indo-Nepal Friendship Treaty ba pynsyier ki Nepali ha Block I & II : Sutnga

Shillong, Iaiong 17 : U nongai buit jong Ka Sur U Paidbah Hynniewtrep u bah Erwin K Syiem Sutnga u la dawa ba dei ban bishar bniah biang ïa ka Indo-Nepal Friendship Treaty ha kane ka jylla Meghalaya namar ki Nepali kiba sah ha ki shnong kiba hap ha Block I bad Block II ki long pynban ki nongpynsyier ïa ki paid Khasi-Pnar.
\ ïa kane u la kren ha ka jingïalang paidbah ba la pynlong daka Hynniewtrep Border Dispute Redressal Forum(HBDRF) bad ka Labang Nongphyllut People Council (LNPC) ha Mukroh ba la don lang ruh da u MDC ka Mukroh u ma Aibor Shadap.
“ Ki jaidbynriew Nepali ki la wanrah pynban ka jingshong syier ïa ki paid Khasi-Pnar kiba sah ha Block I bad II namar ki ïoh ban rung laitluid sha ka jylla Meghalaya namar kane ka jingïateh paralok ( Treaty)” ong u bah Erwin Sutnga.
Nalor kane u la ther ruh ïa ka soskular ne ka Memorandum of Understanding (MoU) ba la ïasoi hapdeng u Myntri Rangbah ka Meghalaya u Conrad K Sangma bad Myntri Rangbah ka Assam u Himanta Biswa Sarma da kaba ong ba kane ka soskular ka dei kaba ktah jur ïa ki paid nongshong shnog ka jylla Meghalaya namar ka jingïasoi kyrkieh ka la wanrah ka jingduh nong kaba khraw ïa ka jylla namar bun ki jaka puta ki la leit sha ka Assam.
U la ong “ U Conrad um don hok ban ïasoi ïa ka soskular namar ki jaka kim dei jongka sorkar hynrei jong ki riew paidbah bad ki Raid, ki Hima bad kane ka jingleh jongu ka long kum ka jingïuhroit ïa u pud u sam ka Sixth Schedule”.
U la ïathuh ba un sa ïakynduh ïa ki Dorbar Shnong, Raid bad Hima bad kumjuh ruh ïa kito ki paid nongshong shnong kiba la shah ktah jur na kane ka soskular ha ka Lah Sngi U Blei ban ïa shim rai ban ai ka jingujor mukotduma sha ka ïing bishar Supreme Court halor kane ka MoU.