Lada nga jop hapoh 3 bnai yn weng noh ïa ki Pulit CRPF na ka shnong Mawlai: Teibor Pathaw

Shillong, Rymphang, 23: “Lada nga jop, hapoh lai bnai yn weng noh ïa ki Pulit CRPF na ka shnong Mawlai,” ong u Bah Teiborlang Pathaw haba kren ha ka jingïalang ïalap elekshon ban pan jingkyrshan na ki paidbah nongthep vote ka shnong Mawlai Nongpdeng kaba la long ha ka janmiet sngi Palei.
Kum ban shu pynkynmaw hangne, ka Sorkar ka ladep ïa ka Soskular bad ka tnat CRPF ban ai jaka 10 akar ha New Shillong Township na ka bynta ban shna ïa ka ktem sah ynda la pynkynriah na ka shnong Mawlai.
U Myntri Rangbah ka Jylla u Conrad Sangma u la ong ba ka jingpynkynriah ïa ki CRPF sha New Shillong Township kan urlong tang shu ai jingmynjur na ka Ministry of Home Affairs, ka Sorkar India, ban shimti ïa ka jaka ba la ai da ka Sorkar Jylla.
Haba ïathuh ba tang shu jop kum u MDC ha u snem 2019 um shym la shongthait ban wanrah ïa ki song pynroi ha Mawlai Constituency, u Bah Teiborlang u la ong, “ngam shym la shong klikti ha kine ki saw snem ba nga la long kum u MDC da ka jingïatreilang ryngkat bad ki Rangbah Shnong kiba bun ki kam ban trei na ka bynta ka jingdonkam jong ki shnong ki thaw. Ha ka jinglong MDC jong nga, kumba 100 klur tam nga la wanrah ha Mawlai bad nga angnud ban shakri hok ïa ka Mawlai naduh u snem 2023 lada phi pynkup bor ïa nga.”
“Ngan peit ïa ka roi ka kiew ha Mawlai Constituency, ïa ka lynti ka syngkien, ka umbam umdih bad kiwei kiwei ki jingdonkam bad ki don bun ki skhim ban pyntrei haba phi don jingtip. Nalor ki skhim Sorkar kiba ngi dei ban ïoh, ha ka shnong Mawlai, nga la wanrah ruh ïa ka skhim na ka tnat shipai Assam Rifles ban ïarap ïa kawei na ki skhim ba la shah iehbeiñ ha Mawlai. Ka shong ha ka jingstad kumno ban wad ïa ki skhim. Ailad ïa nga tang shisien, phin sa ïohi ïa ka jingkylla ha ka shnong Mawlai ban pynlong kum kawei na ki Model Constituency,” u la ong.
Ha kaba ïadei bad ka jingkyrduh kam jong ki khun samla, u Bah Teibor u la ai mynsiem da kaba ong, ‘ki khun samla ka shnong Mawlai ki la duh jingkyrmen hadien ba la pyndep ïa ka jingpule bad kim donlad shuh ban phai shano shano ruh hynrei ka shnong Mawlai mynta ka kynti hapoh ka jingïalam jong nga ngin wanrah ïa ka Youth Centre kaba kyrpang.”
“Naduh u snem 2018 ka Sorkar ka la plie lad ïa ki samla lyngba ka Prime Hub ban sengkam sengjam hynrei u MLA jong ngi um tip eiei. Hynrei sngewsih ka long ba ym don ba ïalam lynti ïa ki khun samla. Ynda nga la jop ngan ïalam lynti ïa ki samla sha ka lawei kaba phyrnai,” u la ong.
U la ïathuh ruh ba ka kam kaba u la seng naduh u snem 2002 ka la pynim ja ïa kiba bun ki longiing ha ka shnong Mawlai.
Da kaba buh jingkylli ïa u MLA barim u Bah Process T. Sawkmie uba long u kyrtong ka UDP, u Bah Teibor ula ong, “hynrei ha ka jinglong MLA jong phi (Bah Process T. Sawkmie) katno tylli ki kam ba phi la pynmih. Hato la don kawei ruh? Lada nga jop, ngan dang pynkhlaiñ shuh shuh ïa kane ka kam khnang ba ki khynnah Khasi kiba don ha Mawlai Constituency kin ïoh ïa ka lad kaba ngan plie.”
Namar ka jingsngewkhia ïa ka jingngop jong ki khun samla ha u drok, u Bah Teibor u la ong, “ka jingwan hiar thma jong u drok, ngan sas shim ïa ka jingkitkhlieh ba kum u MLA da ka jingïatreilang bad ki shnong ki thaw, ki Seng Samla, ki Seng Kynthei ngin sa pynduhjait hapoh ka shnong Mawlai.”
Halor ka jingkynnoh jong u Bah Process ba la pynsangeh ïa ka jingtap slab ha mawlai Nongpdeng, u la ong,”hato nalor jong phi u MLA dang don mano uba donbor ban ban pynsangeh. Lada dang don uba dang lah ban pynsangeh ïa ka kam ka mut ha u snem 2023 phim long shuh uba bit ban long u MLA.”
U Bah Teibor u la ong ba ka jingsangeh ïa ka jingtrei ka dei na ka daw ka jingpynthymmai ïa ka dor jong ka jingtrei ïa kaba ki nongkitkam shnong ruh ki tip. “Lada nga jop ha ka 2 tarik, Lber, 2023 ngin pyntreikam noh ïa kane ka kam ban tap slab pyndep.”
Ha kaba ïadei bad ka jingong jong u Bah Process ba lada un jop biang un sa knieh noh ïa ki Work Order na ki Kontraktor jong ka NPP, u Bah Teibor u la ong, “oh! haduh katno phi donbor? Hato ka Work Order phi trei ma phi. Kynmaw ba ïa kine ki kam ym dei ba ai ma phi, ka ai ka tnat PWD.”
Ha kaba ïadei bad ka jingshna ïa ka jingkieng dewbilat ha Mawlai Nongpdeng u Bah Teibor u la ong, “phi dei tang u nongbud dien phim dei u nongsdang. Dei ka jingshimkhia jong u Bah Prestone Tynsong la lah ban pyndep ïa kane ka kam bad ha ka jingplie ïa kane ka jingkieng ïa phi ym shym la ai kren namarba phi dei tang u nongbuddien bad phim dei u nongsdang.”
Shuh shuh u la pynkynmaw ruh ba shwa ban rung sha ka jylli jong ka saiñpyrthei, u dei tang u nongsengkam bad um dei satia u nongkhaii. Kaba jingkynnoh ba nga la shim Commission ka dei kaba bakla. Lada phi kwah ïa ki jingshisha sa wan sa pynbeit haei ka jaka ngin ïa pyni nia.”