Lada ngi bamsap kumba kynnoh ngin ym jop lai sien lai wat ha Bengal: Mahua Moitra.

Shillong, Rymphang 23: Ka Member of Parliament (MP) jong ka AITC sha Lok Sabha ka Mahua Moitra ka la kyntait war ba ka don ka jingshisha halor ka jingkynnoh kiwei ki party ba ka TMC ha ka jingsynshar jong ka ha West Bengal ka don ka jingshyrkhei ka bamsap.
Haba kren sha ki lad pathai khubor, ka Mahua Moitra ka la ong ba jin lada ka jingshisha ka don kumba la kynnoh ba ka sorkar TMC ha Est Bengal ka dei kaba bamsap haduh katta katta ki paidbah jong kane ka jylla kin ym jin la da pynjop ïa ka party lai sien lai wat.
“Dei namar ki paidbah ki ïohi ba ka don ka jingkyrmen bad ka synshar kaba kyntiew ïa u paidbah ba ki pynjop ïa ngi kum ka party haduh lai wat bad lada ngi bamsap kumba la kynnoh ngin ym ïai jop shijop kawei ka eleskhon hadien kawei pat,” ka la ong.
Haba ïadei bad ki jingkynnoh ba ka TMC ka dei ka party kaba ïakhun elekshon ban ïarap ïa ka BJP da kaba tuh noh ïa ka vote ka Congress, ka Mahua Moitra ka la ong ba ka dei ka jingkren khynnah khunlung jong ka Congress namar ka TMC lada peit ha ki elekshon kiba ka ïakhun pyrshah ïa ka BJP bad ban pynrem ruh bad kujuh ha Parliament ka ju ieng ban pyrshah bad pynrem ïa ka BJP ïa ki aiñ bad ki jingleh jong ka.
“Ngim leit ban ïakhun elekshon ha Himalchal Pradesh ne Madhya Pradesh, ngim ïakhun ha Rajasasthan bad kiwei ki jylla kiba ka Congress ka dang don bor bad don mon ban ïakhun pyrshah ïa ka BJP mhynrei balei nghi ïakhun ha Meghalaya ne Tripura ne Goa bad ki katto katne tylli kiwei pat ki jylla ka dei namar ngi ïohi ba ka Congress kam lah ban ïakhun shuh pyrshah ïa ka BJP bad ngi wan ban ïakhun ban ailad ïa ki paidbah ban jied ïa ngi namar ngi don ka mon bad ka jinglah ban ïakhun pyrshah ïa ka BJP,” ka la ong.
Ka Mahua ka la ong ba ka ba kongsan ïa ki paidbah ka Meghalaya kidei ban sngewthuh ba ka TMC kadei ka National Party bad ka wan ha Meghalaya ban ïarap ïa ka jylla ban ïoh ka sorkar kaba treikam na ka bynta ka bha ka miat u paidbah bad ïa ki nuksa ki paidbah ki lah ban sakhi kumno ka TMC ka pynïaid ïa ka sorkar hapoh ka jylla West Bengal.
Haba kren halor ka jingkam u Amit Shah ba ka jylla Meghalaya kadei ka jylla ba bamsap tam hapoh ka ri India, ka Mahua Moitra ka la ong, “Lada ka BJP ka don lang kumba 5 snem bad ka sorkar MDA, ka paw shai ba ka BJP ruh ka ïohi ïa ki kam bamsap ha kane ka jylla, te ka jingkylli ka mih mynta, balei u Amit Shah u sngap jar 4 snem tam hynrei mynta ba la jan ielkshon u la sdang ban kyndit bynriew.”