Ki nong Mairang ki shad ki khlem pan jingthoh por pynbna distrik u Myntri Rangbah : Bah Allan

Shillong, Rymphang 23 : Ka Dorbar Shnong Khliehshnong Sohra ha ka sngi Palei ka la pynlong ïa ka Rynsan Ïatai na ka bynta baroh ki kyrtong kiba aireng na Sohra constituency ha kane ka elekshon MLA kaban long ha ka 27tarik mynta u bnai.
Na ki 7 ngut ki kyrtong, 6 ngut kiba la wan ban pynsngew paidbah ïa ki nongrim katba u kyrtong ka BJP pat um shym la poi satia.
Kitei ki kyrtong ki kynthup ïa u kyrtong ka NPP Bah Allan West Kharkongor, kyrtong ka PDF Bah Gavin Mylliem, kyrtong ka TMC Bah H Khongsit, kyrtong ka Congress Kong Lakyntiew Sohkhlet, kyrtong ka UDP Bah Titos W Chyne bad kyrtong ka VPP ka Kong P Nongrum.
Ha ka kylla kaba nyngkong baroh ki kyrtong ki la ïoh ban pynshai ïa ki nongrim ba ki mih ban aireng ha kane ka elekshon katba ha ka kylla kaba ar pat la bud sa ka kylla kylli jingkylli ïa ki kyrtong.
Na ka liang u kyrtong ka NPP, Bah Allan haba jubab ïa ki jingkylli haba ïadei bad ka ishu Distrik ha Sohra, u la ong ba ki nong Mairang ha ka por ba pynbna Distrik u Myntri Rangbah ha Secretariat ki khlem pan jingthoh hynrei ki ïa shad ïa kmen.
“U Myntri Rangbah u dei u khliehduh ka jylla bad kumta kaei kaba u pynbna kadei kaba shisha. Namar ha ka por ba u wan ha Circuit House Sohra u khlem wan kum u khliehduh ka NPP bad ka jaka ba u wan ruh kadei ha ka jaka sorkar,” u la bynrap biang.
Shuh shuh u ong ruh ba ha katei ka sngi ba u Myntri Rangbah u wan u pynskhem ruh ba ka headquarter kan dei ha Sohra ym shawei pat.
Nalor kine, u Bah Allan ruh u la kren halor ki lad ki lynti kumno bna pliead ïa ki samla ha ka ïohkam ïohjam khamtam ha ka liang ki kam jngohkai pyrthei. U la kren ruh halor ka MCCL nangta ha ka liang ki lynti syngkien, ban don ki projek ban pynneh pynsah ïa ki jingtei u mynbarim, ban don ïa ki jaka test na bynta ki jingpang bapher bapher ha Laitlyngkot bad ruh ha Sohra khnang ba ki paidbha kin ym donkam shuh ban leit shaduh Shillong nalor kiwei kiwei.
U kyrtong ka PDF pat u la pyntip ba ki la don da ki phew tylli ki shnong kiba u la lah ban pynïoh ïa ka surok kali kum u nongmihkhmat ha kine ki snem kum u nongmihkhmat. U la ong ruh ba la dei ban leh da kaba tyngeh ïa ki kontraktor halor ka jingpynslem ban ïa ka surok naduh Umtyngar sha Sohra.
Katba u kyrtong ka UDP pat haba kren halor ka MCCL u ong ba u sngewkhia halor katei ka karkhana bad kumta u shim ïa ka jingkitkhlieh kum u khynnah MCCL. U ong ruh ba kum u nongmihkhmat na ka thain bad kum u CEM u la lah ruh ban thaw haduh saw tylli ki aiñ ha District Council ïa kiba u Lat ruh u la ai ka jingmynjur.
U kyrtong ka TMC pat u ong ba ka thaiñ Sohra ka la donkam khambun ki College ha kylleng ka constituency na ka bynta ban pynsuk ïa ki samla pule. U ong ruh ba donkam wat ban kyntiew kyrdan ïa ki jaka sumar ba don ha ka constituency.
Na ka liang ka kyrtong Congress bad ruh ka kyrtong ka VPP ki la pynshai lang ïa ka nongrim ba ki ïeng na ka bynta ban wanrah ka jingkylla ha ka constituency, ha ki shnong ki thaw bad ha ka imlang sahlang.