Shillong, Ïaiong 17 : Ha ka juk ba ka mynsiem ïarap para briew ka la nang hiar arsut, pynban dang don ki briew kiba don ka mynsiem sngewlem ban kyrshan bad ai biang ka jingkyrmen na bynta kito ki longing ba duh jingkyrmen ba kin lah pat ban ïoh ïa ka durkhmat kaba phuh samrkhie ha ka jingim.
Kam dei satia ka kam kaba suk ba ha ka jaka ba ju ïeng i ïingtrep ba rit yn tei bujli pat da ka ïing bha kaba haduh saw kamra. Hynrei, da kaba buh hakhmat ïa ka mynsiem ban ïarap ïa ki para nongshong shnong, ka Seng Samla Dong Mawbynna ryngkat ka Synjuk Seng Samla Shnong hapoh ka jingïalam jong u samla Ricky Pathaw hapdeng bun ki jingïakhun ki la lah thiaw ban pynïeng ïa ka ïing ha Mawbynna hi kaba ki la pynlut haduh 6lak tam.
Katei baroh ka urlong da ka jingkyrshan borbah jong ki 60 ngut ki nongsamarïa ba bha khamtam eh u MLA ka thain, Bah Hamlet Dohling u ba dei u nongkyrshan ba jar jar ha ka por ba ki sdang ïa katei ka projek.
Katkum ka kaiphod lyngkot, la ong ba ïa katei ka ïing la shna ha ka jinglut kaba kot sha ka 6lak tam bad na kane, kumba 4.90 lak kadei kaba ki paidbah ki noh synñiang da ka pisa bad kumba 1.20 lak pat kadei kaba ki thied da ki tiar kum u nar rot, dewbilat, shyiap bad kiwei kiwei.
Haba bynrap lang, na ka liang u Bah Willson Dohling, Rangbah Dong u la ai ka jingïaroh ïa katei ka kynhun kaba wanrah da ka rukom treikam kaba thymmai bad kaba kham pher da kaba len ïalade na ka bynta ka bha ka miat jong ki para nongshong shnong.
Na ka liang u nongai buit ka kynhun, Bah Ricky Pathaw u la ïathuh ba nyngkong eh dei lyngba ka jingkyrshan ba jar jar jong u MLA ba ki la lah ban pynïaid shakhmat ïa ka kam.
Katba na ka liang i trai-ïing ryngkat ka mynsiem kaba kmen i la pynpaw ka jingsngewnguh ïa baroh kiba don bynta ban pynïeng da ka ïing kaba thymmai, kaba skhem bad kaba kham kylluid ha ka jaka kaba ïeng mynshwa da ka ïing kaba la tor bad jot lut.
“Nga sngewnguh ïa baroh kiba la ïarap ïanga khamtam ïa i Bah Ricky Pathaw namar nga khlem poi pyrkhat ba ngan ïoh haduh kat kane ka ïing. Ngam don ei ei hynrei tang ki jingduwai bad ki jingkyrkhu ba phin nang lah shuh shuh ban ïai ïarap ïa kiba donkam,” i la ong.
Na ka liang u MLA haba kren shwa ban aiti ïa ka ïing, u la ong ba u sngewkmen bad sngewheh mynsiem ban ïohi ïa ka jingtylli jong ki samla katei ka dong kynthup naduh ki bor shnong, ki longkmie, ki longkpa bad ki samla ban shim ïa katei ka sienjam kaba dei shisha ban ïoh ïa ka jingïaroh.
“Ki dang khynnah hynrei ki don pat ïa ka mynsiem ban ïarap. Katno ka long kaba itynnad ban ïohi hapdeng ki Khasi ba ki don ka mynsiem ban ïarap para briew,” u la ong da kaba pynpaw lang ïa ka jingkyndit ba katei ka kynhun ka lah ban pynïeng ïa kat katei ka ïing.
Shuh shuh u la ai ka jingkhublei ïa baroh kiba don bynta ban snohkti lang ban pyndep pura ïa katei ka ïing. Ha kajuh ka por u la ong ruh ba katei ka longkmie ka donbok haduh katta katta ba ki ïoh ïa ka ïing kaba la shna bha, kyntiak bad pynwan dur bha.
Ïa kane ka ïing la aiti da u MLA hi kum u Kongsan sha ka trai ïing, Kong Veroca Kharbudnah ha ka jingïalang kaba lyngkot bad kaba myllung bha ryngkat ka jingsakhi lang ki nongïarap khamtam eh ki nongïalam jong kitei ki samla kiba aiti met bad mynsiem naduh ba sdang haduh ban da dep ka kam.
Ha kane ka sngi la pynshongkun da ka jingdonlang ki nongialam shnong, ki longkmie bad kiwei kiwei.
Ha kane kajuh ka janmiet, na ka liang ka FKJGP, Upper Shillong hapoh ka jingïalam jong u Bah Kitboklang Nongphlang ki la aiti ruh da ka laptop sha i samla Phibajanai Nongsiej i ba dei na katei ka dong hi hadien ba i la ïoh ban pule doktor ha Neigrihms.
Katba na ka liang u MLA bad ruh na ka Seng Samla Dong Mawbynna ki la snohkti lang ban noh jingïarap kum ka jingkitbok ïa itei i samla ba wan na ka longïing kaba kham duna ka ïoh ka kot hynrei iba minot ha ka pule puthi.
