Shah ktah jur ka thaiñ War Jaiñtia Amlarem Sub-Division na ka jingpynjulor u slap bad ka lyer

Amlarem, Ïaïong 17: Ka jingjur palat jong u slap bad ka lyer kumba la ar taiew eiei naduh ka miet sngi Thohdieng ka la wanrah ïa ka jingeh bad jingduh nong ïa ki paidbah nongshong shnong ha ka thaiñ War Jaiñtia Amlarem Sub-Division, la pynsngew da uwei na ki riew rangbah ka thaiñ u bah K. Pohshna uba long u Adviser jong ka Synjuk Ki Waheh Shnong ha u Mawphor.
La ïathuh kane ka jingjur shaba palat jong u slap bad ka lyer kala buh jingeh ïa ki paidbha ka thaiñ ha ka ïaid ka ïeng, ka leit ïew leit hat bad khamtam eh ki paidbah kiba mad ïa ki jingeh haba ki thmu kyrkhieh ban leit sha ki jaka ba donkam na ka jingtwa jong ki khyndew bad ka jingur ki dieng ki siej sha surok ha kiba bun ki shnong hapoh ka thaiñ Amlarem
Ym tang katta kane ka la wanruh ka jingduh bording hapoh ki shnong jong ka Amlarem Sub-Division da ki bun bun sngi namar ka jingshah pynjulot ki sainar, ki post light bad ki Transformer na ka jingwan lynshop ki bor mariang.
Kumjuh ruh kane kala ktah ïa ki ïing ki sem ki nongshong shnong kiba duk ba kyrduh kiba la wan ud wan nam namar ka jingjulor ki ïing ki sem jong ki. La ong ba ki paidbah ki la hap ban leit ud leit nam sha ki rangbah bad ki nongïalam ka War Jaiñtia, khnang ba ka sorkar kan sngewbha ban pynkloi katba lah ban pyntrei ïa ki jingeh khamtam ïa ki surok ïa ki lynti ki synkieñ bad kaba kongsan eh ka dei ka light ha kaba man la ka por ka thaiñ kam ïoh light shuh kaba biang.
Halor kane na ka liang ki riew rangbah ka thaiñ ki la kyrpad jur ïa ka sorkar bad khamtam ïa u Local MLA bah L. Rymbui bad kumjuh ruh ki MDC jong ka War Jaiñtia ba kin wad ki lad ki lynti ban wanrah bad pynbha ïa kine ki jingeh jong ki paidbah kiba la shem shitom ha kine ki sngi ba la bun bun sngi kim ju ïoh ïa ka light bad mar ïa slap malu mala ka light ka duh beit.
Kumta utei u riew rangbah u kwah ïa ka MeECl ban wad bniah na kaei ka daw jong kane ka jingduh light kaba la ktah ïa ka imlang sahlang namar ba bun ki kam mynta la donkam beit ïa ka light bad kane ka jinglip light khah khah ka wanrah ïa ka jingdkoh ha ka trei ka ktah ki paidbah ha ka thaiñ naduh ki office sorkar, ki cyber, ki furniture bad ïa ki khynnah skul ruh kiba la shah ktah namar ka jingbym biang ka jing ai bording light.
La pynsngew ruh ha ka jingleit survey la lap bun ki tiar ki la jot la pei kiba shu repair te ki buh ka jingkyrpad ïa ka MeECL ba kan pynbiang noh ïa ka office jong u Sub-Divisional Officer ha Amlarem naduh ka office haduh ki tiar ki tar bad ki nongtrei namar ba ïa kine ki jingeh ki mih ba duna eh ki nongtrei bad ki linemen hapoh ka Amlarem Sub-Division khamtam eh ha kine ki sngi ba ka la ïoh laka jong ka centre.
Kumba long mynta ka Amlarem Sub-Division ka la nangroi nongpar ha baroh ki liang kumta la buh biang ka jingkyrpad ïa ki bor sorkar ban pynbiang noh ïa ka office bad ki tiar ki tar bad kumjuh ki nongtrei kiba long tista ki ban peit bad ban pynïaid nangne shakhmat ha kaba ïadei bad ka imlang sahlang ha Amlarem Sub-Division.
Utei u riew rangbah ula pynsngew kaba donkam eh ka long ka jingujor pyrshah ïa ka company Jio bad Airtel ki bym pynbiang ïa ki network ha baroh ki shnong War Jaiñtia ki paidbah ki shem shitom namar ba kim don network tista shu lut tang ka pisa ban thep balance, bad kane ka shem shitom haba don kano kano ka kam kyrkieh.
Halor kine ki jingeh jong ki paidbah ki paid a thaiñ ki kyrpad ïa ki bor ba dei peit ba kin sngewbha ban leh ia kaba donkam lym kumta kila kren shai ba kin hap ban ujor sha ki bor ba ha khlieh duh ba kin leh ïa kaba donkam.