Ka jing bym biang bor ding ha baroh kawei ka EJHD ka la buh jingeh ïa ki paidbah ka thaiñ

Khliehriat Iaiong 17: Ka long kaba sngew phylla ba ka jingthut ka bor ding electrict ha East Jaiñtia Hills District ka ju jia khah khah bad kane ka buh jingeh haduh katta katta ïa ki paidbah ka thaiñ, ki don ki shnong bad ki dong kiba mynta la jan don shi taiew ruh kim pat ioh bor ding.
Na ka liang ka Khasi Students Union Narpuh Circle lyngba u General Secretary u samla Sanatomba Bamon, ka kyntu jur ïa ka tnat bor ding ba kan pyrkhat lem ïa ki jingeh jong ki paidbah.
“Ka jingbymioh bor ding shuh mynta da ki taïew, ka long kaba sngew lyngngoh shisha, hooid ngi la sakhi ba ka jingjur palat u slap ka la pynlong ïa ka jingduh bor ding, hynrei pat ka seng ka i phylla ba tang shu hap slap malu mala ruh ka bor ding ka la shu lip la ka lip hi, ym tip shuh na kaei ka daw kaba pynlong kumtei. Ka jingbymbiang ka jingioh bording ha ka thaiñ Narpuh ka dang iai bteng man la u snem” ong u kyrwoh na ka KSU Narpuh.
Ka seng ka kynnoh tyngeh ruh ba ka sorkar ka la leh shiliang shaba palat ha kaba iadei bad ka jingioh bor ding ki paidbah, ka tnat Ka MeECL kam juh map wat la ha ki por exam jong ki khynnah school ruh, katne ka paw shai dei ka jingshah iehbeiñ ka thaiñ Narpuh, i kumba ym don nongmihkhmat naduh MDC, MLA bad MP ki bym juh kren halor ka jingbymioh bording ba tikna sha ka thaiñ, ym tang ka bor ding ka seng ka pynpaw ka jingshah ieh beiñ ka thaiñ wat ha ki lad pynroi ruh ki long kumjuh hi.
Haba kren halor ka jingbym biang ka bor ding hapoh ka District bad ha ka thaiñ Narpuh hi, ka KSU Narpuh ka pynpaw ba kiba bun ki paidbah ki shu shong ha ka jingdum da ki taiew katba ka bai bor ding pat tang shu poi 15 ne 16 tarik ki la wan lum beit ha kaba ki paidbah ki hap ban siew beit, ka seng ka kyntu jur ïa ka tnat bor ding ba kam dei ban shu sngap mynthi halor kane ka jingeh jong ki paidbah.
“ Haba phai pat sha baroh ki kharkhana dewbilat kiba don sawdong ha ka thain Narpuh, kine ki thaba khrek wat hapdeng u lapbah bajur ruh, dei halor kane ka nongrim ba ka seng ka kynnoh ba ka sorkar ka leh arsap” kynthoh jur ka KSU Narpuh.
Kum ban shu bynrap, kiba bun ki nong shnong shnong jong ka East Jaiñtia Hills District khamtam ki shnong kiba sha kyndong kiba mad jingeh ha ka jingioh bor ding, katba ïa ka bai bor ding pat ki hap ban siew beit, ka long kaba i jah burom ruh ba wat ha Khliehriat kaba dei ka Headquater jong ka District ruh ka jingduh bor ding ka jia khah khah, kane ka buh jingeh wat ïa ki khynnah skul, ki nongtrei ha ki ophis treikam bapher bapher, ka wanrah ruh ka jingthut ha ka rukom treikam ki paidbah kiba pyndonkam da ka bor ding electrict, lah ban kynthoh ruh ba ka don ka jingdkhoh ha ka rukom treikam ka tnat bor ding ha East Jaiñtia Hills District ha ka rukom sam bor ding sha ki paidbah.