Nongpoh, Ïaiong 17: Kum ka jingkyrshan bad ka jingai mynsiem ïaki bor pynïaid jong ka Northern Ri-Bhoi College kaba dei ruh ka college kaba la angnud da u Dr DD Lapang MLA barim ka Nongpoh, ba long ruh u nongaibuit ka sorkar Meghalaya, u MLA ka Nongpoh u Bah Mayral Born Syiem u la leit ban ïakynduh ïaki bor pynïaid katei ka college naka bynta ban dang kyntiew shaphrang ïa katei ka college ban long ka jingkyrkhu ïaki samla pule ha katei ka thaiñ.
Ha katei ka jingleit kynduh jong u Bah Mayral Born ïaki nonghikai bad ki dkhot ka sponsoring body bad governing body u la aiti ruh ïaka work order kaba 5 lakh tyngka kum ka jingïarap naka bynta ka tulop ki nonghikai bad kiwei kiwei ki jingdonkam jong katei ka college ban dang pyntyllun ïaka shalyntem jong ka jingnang jingstad kumba kadei tang katei ka college kaba don ha katei ka thaiñ.
Naka liang u Bah Mayral Born Syiem u la ong ba ïa katei ka college la seng ha u bnai Nailur 2021 ha Diwon Umden, ban pynurlong ïaka jingphohsniew jong u Dr DD Lapang u ba la don ka jingangnud naduh ki por ba mynshuwa ban wanrah ïaka Northern Ri-Bhoi College ha katei ka thaiñ, nakata ka daw kum u nongmihkhmat bala shimti ïaka kam u la shim ïaka bynta ban pynurlong ïa katei ka college bala lah ban plie paidbah ïaka hapdeng ka jingiphuh iphieng ban long kum ka shlem hikai naka bynta ki khun samla ka thaiñ haka Arts Stream ba kim donkam shuh ban beh shaduh Nongpoh bad kiwei kiwei ki jaka pule ba sha jngai hynrei katei ka college kan long ka jingkyrkhu khamtam ïaki kmie ki kpa kiba phah pule ïala ki khun.
U la ong ruh ba katei ka college mynta la shu pynlong ha ka jaka jong ka Nongtluh Higher Secondary School shipor bad naka liang jong u kum u MLA u la lah ruh ban ïarap kumba 5 lakh haka sngi plie bad kumjuh ruh 5 lakh tyngka mynta u bnai kum ka jingïarap ban siew ïaka tulop ki nonghikai bad kiwei kiwei ki jingdonkam kum ka jingkyrshan kat bym pat ioh jingïarap naka sorkar bad dang don ruh hapdeng ka lynti ban wad ïaki jingïarap.
“Kynmaw lem haki jingduwai ba katei ka college kan dang kiew shaphrang ban long ka jingkyrkhu ïaki samla pule na kylleng ki shnong bad ki thaiñ ba markhap jong ka Umden bad lehse lyngba katei ka college kin sa mih ki khraw pyrkhat ban long ka jingtyngshaiñ ïaka shnong ka thaw bad ka thaiñ baroh kawei” bynrap u Bah Mayral.
