Da ka shab u Prah ïoh baroh 18 ngut ki kyrtong ka VPP

Shillong, Rymphang 10: Watla ka Election Commission of Ri India (ECI), kam pat shym la mynjur satia ïa ka jingtyrwa ka Voice of the People Party (VPP) ba u symnbol kyllum (Common Symbol) jong baroh ki kyrtong jong ka kan dei da u ‘Prah’ hynrei ha ka sngi Thohdieng baroh 18 ngut ki kyrtong ba ka VPP ka pynïakhun ki la ïoh ïa u prah kum ka shab ba kin ïakhun ïa kane ka elskhon.
Haba ïakren bad u President ka VPP u Bah Ardent Basaiawmoit u la ong ba kum ka party ka don ka jingngeit kaba skem naduh ka sngi kaba sdang ba ki kyrtong kiba ka party ka pynïeng kin ïoh beit ïa ka shab da u Prah wat la ka party ka slem khyndiat ban phah ïa ki kyrteng jong ki kyrtong kaba la pynlong ïa ka ECI ban ym ai ïa u Prah kum u common Symbol ka party.
“Hynrei ha ka sngi Thohdieng haba ki Returning Officer ki ai ïa ki symbol baroh ki kyrtong kiba ngi pynïakhun ki ïoh da u Prah bad kane hi ka la dei ka jingjop ïa ngi kum ka party,” u la ong.
“Kum ka party ngi kwah ban ong, ka Registration kaba baroh ki la pyntieng ba ngin ym ïoh hynrei ngi jop, ka sorkar ka khang ba ki nonghikai kolej kin shim bynta ha ka saiñ pyrthei namar kiba bun ki nongtrei bad ki kyrtong ka party kidei ki Professor bad ngi la ai case pyrshah ka sorkar bad ngi jop, kiba bun ki la sngew duh mynsiem ïoh ba ki kyrtong jong ngi kim ïoh ïa u Prah kum ka shaba jong ki kyrtong jong ngi hynrei ngi jop bad ngin dang ïai jop nangne sha khmat bad ka Burom hi ka dei sha U Blei,” u la bynrap.
Lah ban kdew hangne ba u Under Secretary ka ECI u Manish Kumar, ha ka la phah sha u President ka VPP ha ka 3 tarik Rymphang 2023, la kdew ba ka Commission kam pat ai jingmynjur ban pynlong ïa u ‘Prah’ kum ka shab jong ki kyrtong ka VPP na ka bynta kane ka elekshon MLA-2023 ban long ha Jylla Meghalaya.
Une u Heh Ophisar u la pyntip ba kat kum ka jingtyrwa jong ka VPP ba la phah da ka shithi ha ka 25 tarik Kyllalyngkot bad da ka email ha ka 30 tarik Kyllalyngkot, u la pyntip ba ka Commission ka donkam ïa ka thup jong ki Constituency ban pynïeng ïa ki kyrtong ka long kaba donkam bad ba hap ban ai hapoh 5 sngi shuwa ka sngi ba pynmih ïa ka jingpynbna (Notification) ïa ka tarik jong ka elekshon, kaba dei ban long ha ka 25 tarik Kyllalyngkot.
“Namarkata, ka jingkyrpad ban ai ïa kawei ka shap sha ki kyrtong bala pynïeng da ka Party na ka bynta kane ka elekshon MLA ha Jylla ka dei ka bym pat ai jingmynjur” ong u Manish Kumar.Shuh shuh ka Election Commission of India (ECI) ha ka sngi Thohdieng lyngba ki RO ka la mynjur ïa ka shab ‘Torch’ ban long kum ka shab jong ka KAM Meghalaya ha kane ka ilekshon ka ban long haka 27 tarik mynta u bnai.
Lah ruh ban kdew hangne ba ka KAM Meghalaya ha kane ka elekshon ban wan ka pynïeng 3 ngut ki kyrtong ba kynthup ka Kong Angela Rangad ban ïakhun na South Shillong Constituency, ka Kong Wanpynhun Kharsyntiew na East Shillong bad u Bah Kyrsoibor Pyrtuh na North Shillong.