Shillong, Rymphang 10 : U National President ka National People’s Party (NPP) bad Myntri Rangbah ka Jylla Conrad K Sangma, ula ong ba dei ka jingjur palat ka jingsngew sarong bad hanga mei kaba pynlong ïa u Nongïalam ka AITC Dr Mukul Sangma, ban phet noh na ka Congress namar ka jingshah jied u ma Vincent H Pala kum u President ka Congress ha Meghalaya.
U Conrad ula kren ïa kane ha ka jingïaid ïalap elekshon ha kylleng ki jaka jong ka 41-Songsak Constituency kaba mihkhmat da u Dr Mukul Sangma. U Conrad ula ïaid ïalap elekshon ha ryngkat u Symbud Lamphang ka ïingdorbar Timothy D Shira, ban pan ia ka jingkyrshan ïa u kyrtong ka NPP Nihim D Shira, u ban ïakhun pyrshah ïa u Dr Mukul.
“Ka Congress Party kala ïapait ïapra. Ka Congress ka dei ka Liang Pyrshah kaba khlaiñ bha ha ka Jylla. Ki ju ïashimbynta shitrhem bha ha ki jingïatai bad ngi (NPP) ha ïingdorbar, hynrei, ka jingiapait ka Congress kala pyntlot bor ïa ka Liang Pyrshah. Kala nang tlot da ka jingphet sha sa ka TMC ha kaba bun ki dkhot ki MLA kila leit rung sha kiwei pat ki party.Kane ka pynlong ban ym don satia ka Liang Pyrshah hapoh ka Jylla” ong u Conrad.
Haba ñiew tang ïa ka NPP kum ka rynsan jong ki paid riewlum ka Jylla Meghalaya bad ki Jylla hapoh ka Ri ba la pynkha da u (L) P A Sangma, ula pan ïa ka jingkyrshan ban nang pynkhlaiñ ïa ka party (NPP) namar ka party kala nang khlaiñ ha kylleng ki jaka ka Jylla bad ki paidbah ka Songsak ruh ki dei ban wanlang ha kaban vote noh ïa ka NPP.
“Ngin sa thaw ïa ka Sorkar ha Meghalaya da ka jingjop ba dap pura” ula ban jur.
“Ngim donkam than ban pyrkhat ïa ka elekshon ban wan. Kala shai kdar ba ka NPP kan wan biang ha ka bor da ka jingjop kaba bun” ula pyntip sha ki nongthep vote ka Songsak bad pan ïa ka rai jong ki na ka bynta u Nihim D Shira.
Ha Dagal, une u Khliehduh ka NPP ula ong ba wat hapdeng shibun ki jingtynjuh bala buh hakhmat ka Sorkar hapdeng ka jingwan lynshop ka khlam Covid, ka NPP kala kut jingmut ban pynthikna ïa ka jingïaid shakhmat ka roi ka par.
“Ha kine ki san snem, ka Sorkar kala lah ban leh shibun kiei kiei ki bym ïahap satia bad kaei kaba la leh ha ki 20-30 snem bala leit noh. Ka Sorkar NPP ka la shna ïa bun bah ki surok ha kylleng ki jaka jong ka Jylla” ula bynrap.
U Conrad u pyntip ba ha ka jingdap 45 snem ka jingïoh Jylla ba pura, tang 4500 tylli ki Longïing ha jylla kila ïoh ïa ka umbam umdih hala ïing hapoh ka Jylla hynrei ka Sorkar MDA ba ïalam da ka NPP kala pynïoh haduh 3 lak ki longïing ïa ki umbam umdih hala ïing lyngba ka skhim JJM ha kine ki lai snem.
U Conrad ula ong ba haba buh hakhmat ïa ka jingmyntoi ki paidbah, ka Sorkar ba ïalam da ka NPP kala pynleit jingmut eh ha ki kam pynroi ha baroh ki liang hapoh ka Jylla. Ula ong ka Sorkar kala aibor ïa baroh ki MLA ha ki District bad ki Constituency ba kin rai ïa kiei ki jingdonkam ba bha tam ba kin leh kat kum ki jingdonkam ba hakhmat eh.
“Ki MLA jong ngi kila long Myntri Rangbah hala ki jong ki Constituency. Ngi la aibor ïa baroh ki MLA namar ngi kwah ba ki Nongmihkhmat paidbah kin rai hi dalade ïa kaei kaba bha tam na ka bynta ka constituency lajong” ong une u Khliehduh ka NPP.
Ula ban jur ba u MLA ka Songsak Dr Mukul Sangma um ju wan ïakrren satia bad u bad namar kane, ka Sorkar kam shym la lah ban leh eiei na ka bynta ka Songsak. Hynrei u Kyrtong ka NPP Nihim D Shira u ju wan ïakren man ka por bad u ban pynthikna ba ki kam pynroi bapher bapher bad ki kam bhalang kin tyllun lang ha ka thaiñ Songsak.
Ula kynnoh ïa u Dr Mukul Sangma halor ka jingïehkhunswet ïa ki paidbah ka Constituency tang namar ka jingsngew meng bad jingsngew pher ha ki kam saiñ hima sima. Ula ong ba kum ki MLA khlem da kheiñ party, ki dei ban wan ïakren bad ïatreilang bad ka liang synshar.
“Khublei ïa u Nihim D Shura, uba la trei shitom na ka bynta la bha ka miat jong ki paidbah ka Songsak, ba ki prokram bad ki skhim ka Sorkar kila wan hapoh ka Constituency” ula bynrap.
U kyrtong ka NPP na Songsak Nihim D Shira ula pan ïa ka jingkyrshan na ki nongthep vote halor ka nongrim ba u dei u trai shnong. Ula ong ba u Dr Mukul Sangma ula shet kylla ïa ki paidbah ka Songsak bad ka dei ka por ïa ki paidbah ban rai bad kyntait noh ïa u Dr Mukul.
“Ki paidbah ka Songsak kila ai ka jingkyrshan hynrei ula jied ïa ka Tikrikilla. Balei ba ki paidbah ka Songsak kin vote ïa u nongwei?. Kala dei ka por ïa ki paidbah ka Songsak ba kin ai ka jingshaniah ha u Trai Snong” ula ong.
