Ka NPP kan jop ha baroh ki Constituency kiba don ha khappud bad Assam: Bajop

Shillong, Rymphang 10 : U nongaiktien ka National People’s Party (NPP) ha Meghalaya, u Bah Bajop Pyngrope u la ong ba ka NPP kan jop beit ha baroh ki constituency kiba don ha khappud bad ka Assam, namar ki paidbah ki sngewthuh ba dei tang kane ka seng kaba shim ïa ki sienjam ban pynbeit ïa u pud u sam.
“Ki paidbah ha khappud ki la sngewthuh ba dei tang ka Sorkar ba ïalam da ka NPP kaba la shim khia ban pynbeit ïa u pud u sam bad ka Jylla Assam, katba kiwei ki Sorkar la 50 snem kim shym la treh ban leh eiei bad dei na kane ka daw ki ai ka jingshaniah ruh ha ka party,” u la ong.
Shuh shuh u ong, “Nga nud ban ong ba ngin jop ha baroh ki constituency kiba don ha khappud.” Ha kawei ka liang une u nongïalam ka NPP u la ong ruh ba ka jingmih jong ki paidbah ha ki khyndiat sngi ban ai ka jingkyrshan ïa ki kyrtong ka party ha ka por ba ki leit ban thep kyrteng ha ki kylleng ki jaka ka pyni ba ki paidbah ki don ka jingshaniah ha ka party bad ki kwah ba ka NPP kan ïoh ban synshar marwei ha ka Sorkar.
“Ka jingmih ki paidbah kadei ruh namar ba ki shaniah ïa ka party bad ka dei lang ruh ba ki mon ïa ki kyrtong ba ka party ka la pynieng ha kiba bun ki constituency,” la ong u Bah Bajop bad bynrap shuh shuh ba ka NPP kan jop bun tam ki MLA ha kane ka election.
Haba bynrap lang, u nongïalam ka NPP, u Bah John F Kharshiing u la ong ba ki paidbah ki dei ban shai haba ki briew ki kynnoh shi kynnoh ïa ka party ka mut ba kadei ka party kaba treikam. “Nga tip skhem bad phi ruh phi dei ban shai, haba ki briew ki kynnoh shi kynnoh ïa kata ka party ka mut ba kata ka party ka treikam,” la ong u Bah John Kharshiing haba kren ha ka jingïalang na ka bynta ka kyrtong jong ka NPP ha Rynjah.
U Bah Kharshiing u la pynkynmaw ruh ïa ki kam ba ka Sorkar ba la ïalam da ka NPP ka la leh naduh ba ka shimti ïa ka jingsynshar, ha kaba u la ong ba ha u snem 2018 ka don ka jingsiew ba sahkut sha ki ASHA, ha kaba kane ka Sorkar ka la pyllait phew klur tyngka ban siew ïa ki arrear jong ki ASHA kaba la sahkut la bun snem. U la ong shuh shuh ba san snem mynshwa ki longïing kiba ïoh ïa ki kor um haduh ha ïing ki long tang 4500 tylli eiei, bad ha ki san snem kane ka Sorkar ka la lah ban pynrung haduh 2,80,000 tylli ki longïing ban ïoh um haduh ha ïing bad kane ka prokram ka dang bteng haduh mynta.
Ha kaba ïadei bad ka card MHIS, u la ong ba kane ka sorkar na ka jingïarap kaba la ai mynshwa kaba long 2.6 lak ka la pynkiew sha ka 5.3 lak, nalor ka jingwanrah ïa ki PHC 250 tylli bad pynrung ruh 75 tylli ki sub center ban kyntiew kyrdan. U la ong ruh, “Lada ki kynnoh ïa ka NPP bunjait, ki dei ban peit ïa ki kam ba ka la leh.”