Sohra, Rymphang 10 : Ki la don palat 500 ngut ki nongkyrshan na ki party bapher bapher kynthup naduh PDF, UDP, Congress bad TMC kiba pynïasoh sha ka NPP Sohra ha ka jingïalang kaba long ha Maraikaphon ha ka janmiet sngi Thohdieng.
ïa kitei ki spah ngut ki nongkyrshan la pdiang sngewbha da ki nongïalam jong NPP East Khasi Hills hapoh ka jingialam jong u Bah Jansing Tynsong bad President NPP Women’s Wing, Kong P Nongpluh ryngkat u kyrtong ka party Bah Alan West Kharkongor.
Na ka liang u kyrtong haba pdiang burom ïa kitei ki nongkyrshan na kiwei ki party u la pynpaw ïa ka jingkmen kaba khraw ba ki paidbah ka constituency ki sdang ban sngewthuh ïa ki mat treikam jong ka party.
“Nga sngew mynta ngi la don ha ka semi final bad ngi kyrmen ba ha kine ki 17 sngi ban wan ngin khyrwit bha ban poi sha ka final. Ngim ju kob lypa hynrei ngi sngew kmen ba tang ha kine ki lai bnai katne ngi lah ban trei,” u la ong haba kren ha katei ka jingïalang
Shuh shuh u la ong ruh ba ha ka por ba u mih bad rai ban aireng ha kane ka elekshon ki la don bun bha kiba kren pynduh mynsiem ïa u.”Bun ki ong nga la mih slem palat hynrei mynta pat katne phi ïa don. Ban da sngap ïa kiwei kiba ong ba nga la mih dier por tharai ym poi ïaleh elekshon. Kumta ha Sohra wat kheiñ kai ïa ka NPP. Kumta nga sngewsarong ïa ka jingtrei shitom ki nongïalam,” u la bynrap biang.
Da kaba pyntip ba mynta ki la don palat 60 tylli ki unit jong ka NPP kylleng ka constituency, u Bah Alan u la ïathuh ruh ba ki la don haduh 40 tylli kiwei pat ki kynhun ki bym kwah ban pynïasoh party hynrei kiba kwah pat ban trei bad ïarap ïa u
Nalorkata u ong ba wat ki paidbah ha Nongkynrih bad Laitlyngkot ki la ong ba ki sniewbok namar mynshwa ha ka por ki dang hap lang ha constituency u Bah Prestone ki pahuh pahai hynrei mynta pat kam long shuh kumta.
