Mawthadraishan, Ïaiong 15: U lum Mawthadraishan uba long kum ka jaka jngohkai ba pawnam ha West Khasi Hills District, mynta u la kup ïa ka dur kaba nang kham itynnad shuh shuh, da ka jingbuh ïa ki jaka jngohkai kiba thymmai.
Halor jong une u lum la tei ïa ka jngoh ne ka View Point kaba lom kum ka kynja tower kaba jrong, ha kaba ki paidbah ki lah ban kiew na ka bynta kaba kham sha jrong ban peitkai kylleng kylleng ki jaka kiba don sawdong jong une u lum.
Lah ban kdew hangne ba une u lum naduh ki por ba kham mynshuwa u la ju khring ïa ki paidbah nongleit peit jngoh pyrthei namar ka jingdon ki pung kiba itynnad bad ka jinglah ban ïohi ïa ki shnong ki thaw da ka jingdon jong u ha ka jaka ba kynjang.
Ka jingtei ïa ka Viewpoint khlem pep kan khring shuh shuh ïa kiu paidbah nongleit jngoh pyrthei. Ïa kane ka viewpoint la shna da ka Khasi Hills Autonomous District Council ha ki snem kiba ladep. Nangta la pynbha ruh ïa jaka sangeh kali, ha kaba la siang da ki tiles kiba itynnad kaba la wanrah ïa ka jingkhuid jong kane ka jaka. Kaba la kham pynsuk shuh shuh ïa ki paidbah ka long ka jingsiang rong ïa ka surok naduh Nongshillong haduh une u lum. Mynta ka shim por tang khyndiat minit bad la kumno kumno hapoh shiteng kynta la lah ban poi na Nongshilong haduh kliar lum Mawthadraishan.
U Lum Mawthadraishan u don marjan bad ka Mawphanlur, kaba long kawei pat ka jaka jngohkai ha kane ka thaiñ Sepngi jong ka Ri Khasi. Mynta ka la don ka jingpynbha ïa ka lynti ïaid kjat na kliar une u lum shaduh Mawphanlur.
Kiba ju poi sha une u lum ha ka por mynstep khamtam haba shai bha ka mariang, ki ïathuh bal ah ban ïohi ïa ka nongbah Guwahati bad don ki por ruh ba lah ban ïohi ïa ki lumbah Makashang ne ki Himalaya.
