Ieng skhem ka Sorkar ban pynkynriah noh shawei ïa kiba sah ha Them-metor

Shillong, Ïaiong 13 : Ka sorkar jylla ha ka sngi Balang ka la ieng skhem ba kan ïaid beit shakhmat na ka bynta ban pynkynriah noh shawei ïa kito kiba sah ha Them-metor kumba la mynjur da ka High Level Committee.
Haba kren bad ki lad pathai khubor hadien ka jingkynduh bad ki nongïalam jong ka Harijan Panchayat Committee (HPC) ha Secretary ha kane ka sngi, u Bah Prestone uba dei ruh u Chairman ka High Level Committee u la ong ruh ba kin kynduh biang sa shisien pat ha ka 25tarik mynta u bnai na ka bynta ban pynstet ïa ka kam.
Watla um pat pynshai shaei pat kin pynkynriah ïa kitei ki briew hynrei na ka liang u Bah Prestone u la ong ba ka la don ka jaka ba ka sorkar ka la pynkhreh. Shuh shuh u la pyntip ba u la dep ban bthah ruh ïa ki dkhot ka HPC ba kin pynsngew ïa katei ka khubor jong ka sorkar sha kito kiba sah hangtei.
Halor ka jingkylli, u Bah Prestone u la ïathuh ruh ba ki la don 342 tylli ki longiing kiba sah ha katei ka jaka bad baroh ki dei ki nongtrei ha ki tnad treikam jong ka sorkar.
“Ki don 342 tylli ki longiing bad baroh kidei ki nongtrei jong ka sorkar kynthup ïa kito kiba la trei naduh mynshwa,” u la bynrap biang.
Nalorkata, u ong ruh ba lada ym lah ban buh ïa ki tang ha kawei ka jaka ruh ki lah ban buh kylleng kylleng.
La ïathuh ruh ba na ka liang ka sorkar ki la jied katto katne ki jaka tangba kim pat lah ban ïathuh paidbah namar ki dang ap ïa ka jingtip kaba kham bniah na ki tnad ba dei peit kynthup na ka Municipal bad Urban Affairs Department.
Na ka liang ki nongïalam jong ka Harijan Panchayat Committee haba kren hadien katei ka jingïalang ki la pynpaw ba katei ka jingkynduh ka long kaba seisoh bad mynta ki ap pat sa ka jingïalang kaban long biang ha ka 25tarik mynta u bnai.