Uba shah siat ïap u dei u dkhot barim ka UALA

Tura, Iaiong 13 : Ki pulit ki la ithuh ïa u runar uba kyllon iap ha ka jingïather kuli ha Chibinang, Dadenggre Sub Division, West Garo Hills, ha ka miet Sngi U Blei bad u dei ruh u dkhot uba rim jongka seng kieng atiar UALA.
Une uba kyllon iap ha ki kuli jongki pulit u dei u Wali A Sangma, khun jong u (L) Nickson M Marak na ka shnong Darakona, North Garo Hills. Une u la shong kurim ïa ka samla na Chambakpara ha Chibinang hi kaba hap hapoh ka Phulbari Police Station.
Kat kum ka jingïathuh jong u SP ka West Garo Hills u V.S Rathore, une u Wali A Sangma u dei uba la shah kem teng ha u 2015 katba u dang dawa pisa ha ka kyrteng ka UALA.
Lah ban pynkynmaw ba une ula kyllon iap ha ka jingïasiat bad ki pulit kaba la neh kumba 5 minit ei ei ha Chibinang ha katei ka miet Sngi U Blei. Ka jingjia ka la jia haka por ba ki pulit ki dang ïaid pahara sha katei ka jaka namar ki la ïoh jingtip ba ki don ki kynhun runar kiba ap ktem ban ïoh rahbor ïa ki nongkhaïi kiba na Assam kiba ju wan thied wan pet na Dadenggre. Ha ka por ba ki pulit ki dang ïaid da ki kali, kine ki runar ki la ther kuli beit naphang ïa ki pulit bad ki pulit ruh ki la pynphai kylla kumta ha ka jingïasiat une u Wali u la kyllon iap katba kiwei ki la lait phet. Ki pulit ki la ïoh ban kurup ruh ïa kawei ka suloi AK 47 lem bad ki kuli, ki dynamite na ka jaka ba u Wali u kyllon iap.
ïa ka met jong une u runar la pynkit sha hospital ban pyndep ïa ka post mortem bad ka jingtohkit ka dang ïaid ban lap dien ïa kiwei kiba iadon kti lang.
Shuh shuh, hadien ba ki pulit ki la sakhi ar tylli ki jingjia kiba ki runar ki pyndonkam beit da ki suloi Automatic ba ju pyndonkam tang da ki kynhun kieng atiar mynta ki la sdang ban bud dien tyngeh ban lap dien nangno ki tiar ki ïoh ban wan poi sha ri lum Garo namar ka paw shai ba ki suloi bad pistol khlaiñ bor ki dang tuid beit sha ri lum Garo wat hadien ba ym don seng kieng atiar shuh ruh.
Ha ki por ba mynshwa na ki kynhun nonglute bad runar ki pulit ki ju ioh kurup tang ki wait khukri, ki suloi tynsah, SBBL ne teng teng shu shna tang da ka dieng ha ka dur jongka suloi ruh, hynrei kane ka jingsdang ki kynhun runar ban rah da ki suloi Automatic ka la pynlong ïa ki pulit ban kyndit bynriew bad shim khia bha ïa kane ka kam ban tohkit bad wad ïa ka tynrai mano ba pynpoi ne khaïi tuh ïa ki tiar siat sha ri lum Garo.