Shillong, ïaïong: Ka Seng Rympei Kyrsiew Jait-bynriew (RKJ), ha u kyrwoh lyngba u Bah Shiningstar Lyngwa Chairman bad Bah Ronnie M Rani Social Secretary ka pynpaw ka jingsngew khia ka ba jur ha ka ba ïadei bad ka lawei jong ki khyn nah samla ka ba la khreh shah ktah ha ka bhah thungkam thung jam da ka sorkar Meghalaya ha ki tnat bapher bapher bad namar ka jingtuklar jong ka ïingbishar High Court.
Ka Seng ka la ong ba katkum ka hukum (order) jong ka High Court ïa ka sorkar Meghalaya ba ka dei ban pynsangeh shwa ha ka ba ïadei bad ka jingthung kam thung jam kam long ka ba bakla.
Ka Seng RKJ ka la ong ruh ba katei ka ïingbishar ka la dei ban wad jingtip shuwa naduh mynno ka sorkar ka khlem thung kam shuh ha ki ophis (Dept) bapher bapher, kata kum ha ki tnat Agriculture bad kiwei kiwei.Ka la ong ruh ba naduh ka sorkar barim hapoh ka jingïalam jong u Dr. Mukul Sangma kum u Myntri Rangbah ka jylla kam shym la don kano kano ka jingthung kam hapoh ki tnat bapher bapher, kata kum ha ka Health & Famly Welfare, PWD, GAD, Transport Dept bad kiwei kiwei lait noh tang ïa ki ba trei kontrak, kata ban ai nuksa kum ha ka tnat Agriculture ha ki jaka ba don ha ki Block Development Office la kumba 10 snem tam.Ka la ong ruh ba ki nongtrei ki ba hap hapoh ka jingpeit jong ka ADO ki ïoh mon namar bym don ki ophisar bad ki nong peit nong khmih.
Nalor kata ka Seng ka la ong ruh ba ki don katto katne ki jaka ba don kine ki ADO ka sorkar ka la kyn tiew kyrdan (promotion) noh kumta la sah thylli kine ki kamra.La ong ruh ba dang shen ka sorkar ka dang dep pynlong ïa ka exam interview ïa kine ki ADO ki ba la pass ki long kumba 83 ngut.Kine ki ophisar ki long ban pyndap ha ki jaka ba thylli ha kylleng ka jylla.
Ka Seng ka pynpaw ruh ba kum ha Secretariat ruh bun ki post ki ba thylli hynrei haduh mynta ym pat lah ban thung, ha General Administration Department (GAD) kum ka Estate Office ruh ki post ba thylli la shu trei da ki Muster Roll ki ba la ïoh pension kumjuh ha ka tnat Transport.
Nalor kata ka Seng ka la ong ruh ba kaei ka jingthmu jong ka ïingbishar High Court ym lah ban sngewthuh namar ba ka sorkar ka la pynslem lypa ïa ka jingthung kam kumba la kdew haneng.
Shuh shuh ka Seng ka la ong ba bun ki Dept ki ba la ud ïa ka jingbunkam namar ba uwei u ophisar u hap ban pynïaid ar ne laitylli ki Dept.Ka Seng ka buh ruh ka jingkylli da ka ba ong; Hato ka jingleh ka High Court kam long kum ban pynduh mynsiem bad ktah ïa ka lawei jong ki khynnah ba dei hok bad ba la tbit ban ïoh kam ïoh jam bad kumjuh ruh kan leh kumno lda ka ïai jia kumne bad ka rta jong u/ka khynnah ba wad kam wad jam ka la nang ih (lapse), te shano ka lawei jong ki? Ka Seng ka pynpaw ruh ba dei ban kyrpad ïa ka ïingbishar ba ka dei ban da bishar bniah bha bad ban shim jingmut na ki riew shemphang ki ba la don lypa ha ka.
Khatduh na ka liang ka Seng ka kyntu bad kyrpad ïa ka iingbishar HC ba kan buh jingkylli na ki riew saiñ hima (MLA/MDC) ba katno sien ka la pynkiew tulop ïa ki hapoh ki 5 snem naduh ki por sorkar barim.
