Election MLA-2023: Katkum ka sorjamin ka BJP kan jop 10-15 Seat, kob u Bah Ernest
![](https://mawphor.com/wp-content/uploads/2023/01/ernest-mawrie.jpg)
Shillong, K’lyngkot 19: U State President ka BJP Meghalaya State Unit u Bah Ernest Mawrie ha ka sngi Palei u la ïathuh ba katkum ka jingleh sorjamin ka pynpaw ba ka BJP kan jop 10-15 tylli ki Seat ha ka elekshon sha ka Iingdorbar Thawaiñ ka Jylla ka ban sa long ha ka 27 tarik, Rymphang.
Ha ka jingïakren bad ki lad pathai khubor u Bah Mawrie, u la ong ba ka BJP kan pynieng ïa ki kyrtong ha baroh 60 tylli ki Constituency bad haduh mynta ki don 123 ngut kiba la pan tiket ban ïakhun na ka BJP.
U la ïathuh ruh ba ki don katto katne ki constituency kiba la mih bun ngut ki nongpan tiket kum ha Dalu ha kaba ki don haduh saw ngut bad ha Mahendraganj ki don hynriew ngut,.
Ïa mynta ka BJP ka don tang arngut ki MLA, kata tang u Bah Sanbor Shullai uba mihkhmat ïa ka South Shillong Constituency bad u Bah AL Hek uba mihkhmat ïa ka Pynthorumkhrah Constituency.
U Bah Mawrie u la ïathuh ba ka State Election Committee shen kan sa shong bad ban phah ïa ka kyrteng jong ki kyrtong sha Central Parliamentary Committee ba la khlieh da u Myntri Rangbahduh ka ri na ka bynta ban ai jingmynjur.
Haba kylli, u Bah Mawrie u la ong ba ka party ka khmihlynti ban jop haduh 15 Seat. “Hynrei phi ïohi ngi dang don mynta hapdeng ka jingleh sorjamin,” u la ong haba bynrap ruh ba ïa ka kaiphod sorjamin u ladep aiti ha ka sngi ba la pynkut ïa ka jingïalang jong ka National Executive Committee kaba la long ha Delhi dang shen.
Katkum ka jingïathuh jong u Bah Mawrie, kine ki 15 tylli ki Seat kiba la pynpaw ha ka kaiphod sorjamin ki dei kiba la pynthikna ba ka BJP kan ïoh ïa ka jingjop.
Haba kylli, hato ka jingpynslem ban pynbna ïa ka thup kyrteng jong ki kyrtong kan ktah neem ïa ka party ha kane ka elekshon, u Bah Mawrie u la ong, kum ka National Party, ka BJP kam ju pynbna ïa ka thup kyrteng jong ki kyrtong katba ka ym pat pynbna satia ïa ka tarik jong ka elekshon.
“Namarba ka Election Commission of India ka ladep pynbna ïa ka tarik ban pynlong ïa ka elekshon, ngi la pynkhreh ban sa pynbna noh mardor ïa ki kyrteng jong ki kyrtong jong ngi ruh,” u la bynrap.
Halor ka jingkynnoh jong ka seng Congress ba ka BJP ka la phiel ban leh eiei watla ka la pyrta shla halor kiba bun ki kam bamsap pyrshah ïa ka Sorkar MDA ba la ïalam da ka NPP, u Bah Mawrie u la ong, “bun na ki jyrsieh bamsap kiba nga ladep kdew bad ki la mih lut ha ka kaiphod CAG.”
“Watla ngi ïatreilang hapoh ka sorkar khlehkhaw lang, hynrei ngim shym la pynïaid ïa ka Sorkra. U Myntri Rangbah bad ki Myntri Sorkar ki dei na ka liang jong ki. Phi ïohi barabor ngim ju sngap satia ban kren halor ka jyrsieh bamsap. Ngi la ïakren ruh ïa kane ka mat ha ka National Executive Meeting,” la ïada u Bah Mawrie ïa ka BJP.
Une u nongïalam ka BJP u la ïaiban ba ka rai ban weng noh ïa ka jingkyrshan na ka MDA ka shong ha ki nongïalam ki bahalor jong ka party ban shim.
“Ngi ladep ïakren la bunsien bad ki nongïalam ha Delhi. Ka NPP kam dei satia ka paralok tang ha Meghalaya hynrei ka dei kaba paralok hapoh ka kynhun NDA bad ïa ka rai ka shong ha ki nongïalam ban shim,” u la ong.
Katkum ka jingsngew jong u, ki paidbah ka jylla ki dei ki nongbishar ba stad tam ban shim ïa ka rai ha ka elekshon ka ban sa long.