Sa tang khyndiat por eh ka Meghalaya kan sa jied ïa ki nongmihkhmat kiba thymmai kiban mihkhmat ïa ki constituency bapher bapher baroh 60 tylli sha ka Ïing Dorbar Thawaiñ ka Jylla. Kumta, na ka bynta ki riew shimkabu kane kadei ka samoi kaba paka tam na ka bynta jong ki ban thaw pisa ne ban kamai na ki kyrtong lyngba kiba bun ki jait kam ba ki leh.
Kane kadei ruh ka por kaba paka tam ïa ki katto katne ki jait briew kiba sdang thaw ïa ki kynhun kiba harukom ban ïoh kamai. Kin don kiban thaw ïa ka kynhun ban pynïalehkai phutbol, ki kynhun ba shipor ban trei na ka bynta ka imlang sahlang, ki kynhun ban pynlong jingïakob thei bhabriew rangbhabriew, ki kynhun ban pynlong jingïakob thoh essay, ïakob rwai, ïakob shad bad kin don ruh ki kynhun kiban shim kabu da kaba ong bakin pynlong ïa ki jingsam khusnam ïa kiba pass bha. Kine baroh ki jait kynhun ki ju mih beit tang ha ki samoi elekshon. Kitei ki jait kynhun kin don beit tang para ba sngewthuh jingmut bad da ka jingsngewthuh lang kin leit na uwei u kyrtong sha uwei pat bad kumta ter ter tad haduh ba kin da ïoh ïa ka thong kaba ki kwah.
Kiwei pat ki jait kynhun kidei kiba pynleit jingmut ban wad RTI (Right to Information) da ka thong ban lap bad kam ban sei pyrthei ïa ka bamsap ne ka jingbym ler treikam jong kito ki MLA. Kitei ki jait kynhun ki jur bha ha kine ki por bad wat ki tnad sorkar bapher bapher kin ym lah ban len ba kine kidei ki por ba ki bunkam bha ban pynbiang ïa ki jubab ba pan da kitei ki kynhun kiba pyrshah beit ym ïa ki tnad sorkar hynrei ïa ka rukom treikam ne ïa ki skim jong u MLA. Ka jingmih jong kitei ki jait kynhun ka lah ban dei lyngba ka jingkwah jong ki shimet namar ka jingpyrshah ïa u MLA, don ruh kiba phah da ki kyrtong khnang ban ïoh ther ne ïalap paidbah ha ki rynsan ïalap elekshon.
Hapdeng kitei baroh, don ki kynhun kiba pan da ka jingthmu kaba shisha, khnang ban ïoh pynshai sha ki paidbah ïa kaei kaba la buhrieh ne leh lyndet da u MLA ha ki samoi treikam ba san snem jong ki. Dei lyngba kitei ki kynhun ki paidbah ki sa ïoh ban tip ba don ka skim snaïap ne ki skim ba la ai sha ki briew ki bym ju don kyrteng ha ki shnong ki thaw ne ha ka imlang sahlang.
Haba phai sha kawei ka liang pat, haman la ki constituency la ju ïohi ba shwa ka elekshon, bun bha ki nongleh kam isynei ne ki nongïarap ki pynpaw ïa ka jingkloi jong ki ban tynrong lang ïa ka jingeh ki paidbah. Dei ha kum kine ki snem ba ki paidbah ki ïoh shisien ïoh haduh lai ne saw ngut ki MLA. Jin lada long kumne man la u snem, kan pynsuk haduh katta katta ïa uno uno u MLA uba shu kwah ban kamai ne long MLA tang shi samoi.
Kaba kham i sammut ha kine ki por ka long ba don ki khep ba jia ki jingjia ba sngewsih kum ka ïap briew, dei ki kyrtong (kynthup ïa ki nongmihkhmat) kiba poi nyngkong wat ïa ki bahaïing kata ruh ryngkat bad ki song jingïarap.
Dei ha kum kine ki por ba ki paidbah khamtam ha kito ki constituency ba kim ju kham ïohi nongmihkhmat ki shim kabu ban leit sha ki jingïalang bapher bapher ba khot da ki kyrtong lada ïoh jingmyntoi. Dei ruh lyngba kitei ki jait jingïalang ba wan paidbah ba jan baroh ki kyrtong ba ïa khun ki phuh samrkhie da ka jingkyrmen ba ki la jop beit tangba kim tip pat ba ha ka elekshon hi ha ka jylla, jan baroh hi, ki dang bud ne kyrshan ïa kito ki kyrtong ba ai jingmyntoi. Lah ban ong ba don katto katne ki constituency ba ki kyrtong kim da sam jingiarap than hynrei salonsar hi ka pisa ryngkat ka khawai dawai shi taiew ar taiew shwa ka elekshon ka treikam.
Lada ka long kumne hi, shaei ka lawei jong ka jylla kan poi, khamtam haba ki paidbah kim jied ïa u nongmihkhmat u ban leit ïasaid hynrei ki jied ïa uba lah ban ai jingmyntoi. Kan long ruh ka jinglehraiñ ïa kato ka constituency lada jia ba u nongmihkhmat ba ki jied um lait ban ang wat tang shi kyntien ruh ha Ïing Dorbar, kumta ka por ka la poi ïa ki paidbah ba kim dei satia ban pynlehraiñ ïalade bad ïa ka constituency da kaba jied ïa ki nongmihkhmat ki bym lait wat ban ang shi kyntien ha Assembly ban ïasaid na ka bynta ka thaiñ bad na ka bynta ka bha ka miat jong ka imlang sahlang, ka Jaidbynriew bad ka Jylla hi baroh kawei.
Bunsien hi, haba uno uno u MLA u pyni ïa ka jingtbit jong u ban ïasaid ha Iing Dorbar, ki paidbah lada ki kylli sharum shaneng kin ai nam beit ïa ka constituency kaba pynjop bad lada um ler pat ka jingkren bein kan dei ïa ki nongjied hi. Kumta lah ban ong ba lyngba ki kam ba u nongmihkhmat u pyni ha Ïing Dorbar, ka pynpaw ruh sha ka pyrthei baroh ïa ka jingbym nang lane ka jingshemphang jong ki nongthep vote.
