Shillong, K’lyngkot 17: U Bah Adelbert Nongrum, kyrtong jong ka VPP na North Shillong, u la khot la wer ïa ki paidbah ban jied noh ïa ka Seng Voice of the People Party (VPP) ban pyllait luid ïa ka jylla ki briew kiba nabar.
Haba kren ha ka jingïalang paidbah ha Polo hadien ba u la pynïasoh sha kane ka Party ba laïalam da u Bah Ardent Miller Basaïawmoit, u Bah Adelbert u la ong ba ka jylla ka la shah knieh ha ki briew kiba nabar ha ka liang ka khaïi ka pateng, nangta ha ka liang ka shongkha shongman, mynta byrngut byrnget ka la sdang shah knieh wat ha ka synshar ka khadar ruh.
“Lada ngim phai sha ka VPP, khlem pep ngin sa shah knieh ruh wat ïa ka synshar ka khadar bad kata kan dei kaba kut ïa ka jaidbynriew”, u la ong.
Ha shuwa jong kane, la pdiang sngewbha ïa u MLA barim jong ka KHNAM da u President ka VPP u Bah Ardent Basawïawmoit ha ka jingïalang paidbah kaba la long ha ka sngi nyngkong ha Madan Polo. Shuwa ba un kren u MLA barim ka North Shillong, u la dem khohsiew ban duwai ban panmap na la jong u kpa bala khlad noh, nama ka jingbyrngem jong u ïa la u kpa ha ka por ba u (Adelbert) rung sha ka saiñpyrthei.
Shuh shuh haba kren ha kane ka jingïalang, u la ong ba ki nongïalam jong ka jylla ha kine ki sanphew snem, ki la leh beiñ ïa la ka jong ka ri tang na ka daw ka jingmyntoi jong ki shimet ha ka kam saiñpyrthei. U la ong ba ki samla ki la shah ñion beiñ ba shah leh shiliang khmat ha ka Reservation Policy, namar kiwei kibym ïaryngkat ka jingbun briew bad ngi, ki la ïoh kajuh ka bhah bad kane ka la ktah ïa ki khun samla jong ka Ri Khasi Jaiñtia. “Ka por ka la dei ban phaidien trai ne pynbeit thymmai ïa kane ka Polisi namar ba ka la rim palat kam ïahap shuh”, u la ong.
Da kaba ther tyngeh ïa ki Party kiba la synshar ïa ka jylla, u Bah Adelbert u la ong ba kine ki la synshar ïa ka jylla da kaba tuh bad lute ïa ka spah jong ka jylla bad na ka bhah jong u paidbah, hynrei ki wan pat sha u paidbah kum u suri up snieh langbrot ban pynbieit ban pynthame. “U paidbah udei ban stad ban sngewthuh noh ban nym shah pynbieit shuh ha ki”, u la ong.
Da kaba ïaroh ïa ki kyrtong ba ka Seng VPP ka la sei, u nongmihkhmat ka North Shillong, u la ong ba ki kyrtong ba ka Party ka la sei, kidei kiba la ih bha bad kiba la biang ka jingnang jingstad bad kiba don mynsiem banshakri ïa ki paidbah bad khamtam eh ban ïada ïa ka ri bad ka jaidbynriew. U la wer ïa ki paidbah ban kyrshan tyngeh ïa ki 16 ngut ki kyrtong ba ka VPP ka la pynïeng khnang ba kin wanrah ïa ka jingkylla sha kaba khambha bad kaned baroh ka shong ha ka kti jong ki paidbah nongthep vote jong ki Constituency kiba don ki kyrtong ka Seng VPP.
