Shillong, K’lyngkot, 17: U MP ka seng Congress na Assam u Gaurav Gogoi ha ka sngi Baar u la ong ba ka Congress kan dang wan phai ha ka bor synshar ha Meghalaya na ka daw ka jingphiel jong ka Sorkar Meghalaya Democratic Alliance ba la ïalam da ka National People’s Party ha baroh ki liang.
Ha ka jingïakren bad ki lad pathai khubor, u Gogoi u la ong ba ki paidbah jong ka jylla ki la jlep hi shoiñ ïa ka Sorkar MDA namar ka jyrsieh bamsap kaba mih kawei hadien kawei la ka long halor ka bamsap na ka jingthied ïa ki Smart Meters lane na ka bamsap thied khaw.
“Ki paidbah ki don bun ki jingkhmihlynti hynrei ka bamsap kawei hadien kawei, ka jingbym lah ban ai jingïada ïa ki paidbah, ka jingshah siat ïap kaba la jia ha Mawlai, kine baroh ki long ki jingtlot jong ka Sorkar ba mynta bad nga ngeit ba ki paidbah kin sa ai jingsneng ïa kane ka sorkar bad kin sa phai khmat sha ka seng Congress,” u la ong.
U Gogoi, uba long u Chairman jong ka Screening Committee u la ong baroh ki kyrtong jong ka congress ki long kiba la pynkhreh ïa lade ban ïakhun ha ka elekshon.
“Ngi dang ap ap ïa ka tarik ban ai jingpynbna da ka Election Commission bad ka Meghalaya Pradesh Congress Committee kan sa pynkhlaiñ bha ïa ka jingïalap elekshon ha ki sngi ban sa wan,” u la ong.
U la ong ba u nongpeit pyrman jong ka AICC u Mukul Wasnik bad ka kynhun jong u kin sa leit iuhkjat ha ki bynta bapher bapher jong ka jylla bad ban ïakynduh ïa ki paidbah bad ïa ki kynhun bapher bapher ban lum jingtip shaphang ki jingdonkam jong ka jylla Meghalaya ha kaba ïadei bad ka roi ka par, kaei kaba ki samla ki dawa bad ïa ki jingeh kiba ap hakhmat.
“Hadien kane, ngin sa shong ïa ki jingïalang ha kaba ka Congress kan sa shim rai khatduh ïa ka kyrteng jong ki kyrtong da ka jingmynjur jong u President ka AICC bad ïa ka official list jong ki kyrtong ban sa pynbna paidbah,’ la ïathuh u Gogoi.
Ha ka sien banyngkong eh, ka Congress kan ïakhun ïa ka elekshon sha ka Iingdorbar Thawaiñ khlem ki Sitting MLA hadien ba 17 ngut ki MLA ki la mih noh na ka party bad leit pynïasoh sha ka AITC bad sha kiwei kiwei ki seng saiñpyrthei.
Haba kylli, u Gogoi u la ong ba ki paidbah ka jylla ki angnud ban ïohi ïa ka dur jong ki kyrtong thymmai namarba ki ladep ïohi ïa ka dur jong nongïalam seng saiñpyrthei kiba ryngkang diengkper na kawei na ka party sha kawei pat bad ha ka por elekshon, kine kijuh ki birew kin kular ïa ka bneng ka khyndew hynrei kin ym lah satia ban pynurlong ïa ka jubanlak ba ki la khlei.
Haba kynthoh ïa ka jingkular jong ka AITC ban kyrshan pisa sha ki longkmie bad sha ki samla, u Gogoi u la ong, ““…ki (AITC) la leit sha kiwei kiwei ki jylla da kine kijuh ki jingpynbna bad bun na ki kyrtong ki la shah rem khamtam ha ka elekshon ba la long ha Goa. Ai kin mad shisien bad kin pynlut ïa ka pisa hangne ruh. Nga wan na ka jylla ba marjan, nga sngewthuh bha bad nga tip bha ïa ki buit treikam jong ki.”
Da kaba kynthah ruh ïa ka BJP kaba pynlong ïa ka jinglum jingkheiñ ïa ka jingdon ki Iingmane ha Assam, u Gogoi u la ong, “ ka BJP kam ngeit ha ki nongrim jong ka niam. Kim ngeit ba baroh ki jaitnaim ki ïaryngkat katba ka party jong ngi kaba thaw ïa ka riti synshar jong ka ri, ngi ngeit ïa ka jinglong jong ka jingshai ka ri India bad ka riti synshar jong ka ri ba baroh ki jait niam ki dei kiba ïaryngkat bad ngi hap ban im kum shi hymmen shi para. Ha ka thaiñ Shatei Lammihngi ngi hap ban im kum shi para. Ngi don ka jingïapher hynrei kata ka dei ka bor jong ngi bad kam mut pat ba kan pynïakhlad ïa ngi.”
