Shillong, Ïaiong 12 : U Myntri Rangbah ka jylla, Conrad K Sangma ha ka sngi Ba-ar u la ong ba ka sorkar jylla kan thaw lad ban pynbeit noh ïa ka ishu kaba ïadei bad ka hukum jong ka Iing Bishar kaba la pynsangeh ïa baroh ki jingthung kam jong ka sorkar jylla haduh ban da don noh da ka roster system.
Haba kren bad ki lad pathai khubor, u Myntri Rangbah u la ong ruh ba ki la bishar ïa katei ka phang ha ka jingïalang ryngkat bad u Chief Secretary bad ka Personnel Department.
“Ngi la pynkhreh ïa ka affidavit ban jubab ïa kitei baroh ki jingkdew ba la wanrah da ka High Court bad ngi kyrmen ba ngin lah ban ïaid shakhmat ha ka rukom kaba dei bad ban pynbeit noh ïa kane ka kam namar ki dang don bun ki bynta bad bun ki jingthung kam kum ha ka kam pulit, tnad pule puthi kaba ka jingthungkam ka bun bha ha ka jylla bad ngi kwah ba kane kan ïaid beit,” u la ong.
U la kular ruh ba ka sorkar jylla ka shimkhia ïa katei ka kam bad kumta kin sa jubab shen sha ka High Court.
Lah ban kdew hangne ba ka High Court of Meghalaya ka la phah sangeh lut shuwa ïa ki jingthungkam ha jylla, namar bym don ka Roster System ha ka Reservation Policy jong ka jylla.
