Shillong, Iaiong 12 : Ka North East Student Organisation (NESO) mynta ka sngi ka dawa na ka sorkar pdeng ban pynkylla ïa ka rai ban ym pynlong kompolsori subjek ïa ka Hindi kata haduh Class X ha kane ka thaiñ shatei lam mihngi ka ri India kaba mut ha baroh 8 tylli ki jylla.
Ha ka shithi ba la phah sha u Myntri Kam Pohïing ka ri u Amit Shah, u Chairman ka NESO u bah Samuel B Jyrwa u la ong “ Ka NESO ka la sngew khia bha ïa kane ka kam namar ka sngew dei beit ba ka ktien tynrai jong ki trai ri trai muluk ka dei ban long ka kompolsori subjek bad ka Hindi ka dei ban long ka subjek ban shu ai jied ne elective subject. Ngi kyntu ïa ka ophis jong phi bad ïa ka Parliamentary Official Language Committee ban pynkylla noh mar mar ïa kane ka rai bad pdiang ïa kane ka jingtyrwa jong ngi ban pynlong kompolsori da ki ktien tynrai jong ki trai ri trai muluk kiba im ba sah ha kine ki phra tylli ki jylla”
U la ong ba ka ktien Hindi ka dei kaba kren bad pule da kumba 40-43 % ki briew kiba sah ha India kumta ka long ka rukom ba dei ban ailad ïa kiwei ki jait ktien tynrai ruh ba kin riewspah bad kiew shaphrang ha kito ki jaka ba ki don. U la ong ba ki jylla kane ka thaiñ ki don la ka jong ka jinglong ba kyrpang namar ki trai ri ki don la ka jongka ktien ka thyllied kumta kane ka jingthmu ban phrung ïa ka ktien Hindi ym dei tang ba ka don ka jingthmu sha lyndet ban pynjah rngai ïa ki ktien tynrai hynrei ka long ruh kumba tynrong jingeh ïa ki khynnah skul ba kin don sa kawei ka kompolsori subjek.
Ka NESO ka pyrshah jur ïakane ka polisi bad kan ïeng ban ïai pyrshah jur kumba ka la ju leh ha ki por ba mynshwa ruh. Kat kum ka jingsngewthuh jong ka Seng kane ka jingthmu kan ym wanrah ïa ka jingtehsong bad jingtylli hynrei kan wanrah ka jingïashrut bad jingbym don ka shongsuk shongsaiñ. Kane ka jingthmu ban pynlong kompolsori subjek ïa ka Hindi ka long ruh kum ka jingthmu ban khniot bad pynduh jait ïa ki ktien tynrai ki trai ri trai muluk. Kumta sa shisien ka NESO ka dawa ba dei ban weng noh ïa kane ka jingshim rai bad ban phai khmat pynban kumno ban thaw lad ban dang pynriewspah bad pynroi ïaki ktien tynrai jong ki trai ri ha kine ki phra tylli ki jylla kat kum ka Khyrnit ba Phra jongka Riti Synshar ka ri da kaba mang kyrpang ruh ïa ki skhim bad projek ban pynroi bad pynriewspah ïaki.
