Sdang ka Annual Sports Meet 2022 ka Rymmang Secondary School, Mawjyrsim

Mawkyrwat, Ïaïong 12: U bah H. Staline Diengdoh, MCS, Sub Divisional Officer ba la shongthait jong ka Ranikor Civil Sub Division, mynta ka sngi 12 tarik u Ïaïong, 2022 u la ïoh ban plie pyrda ïa ka ‘Annual Sports Meet 2022’ ba lai sngi jong ka Rymmang Secondary School, Mawjyrsim ba la pynlong hapoh ka madan jong ka shnong Mawsep, South West Khasi Hills District.
Lah ban kdew ba ha kane ka ‘Annual Sports Meet 2022’ na ka liang ki nonghikai la phiah ha ki saw tylli ki kynhun, ‘ka Blue House, ka Green House, ka Red House, bad ka Yellow House’ bad da ka jingïashimbynta shitrhem jong ki khynnah skul ka la long shisha ka jingïalehkai kaba i-phuh i-phieng.
Shwa ba ki khynnah skul kin ïoh ban pyni bad pyndep ïa ka March Past ban sa shim salute da u kongsan, la ïoh shwa ban kyntiew bad pynher ïa ka lama jong ka skul kum ka dak ban plie ïa ka ‘Annual Sports Meet 2022’ ba lai sngi ha ryngkat ka jingsynranglang jong ki nonghikai.
U bah H. Staline Diengdoh, MCS, Sub Divisional Officer ba la shongthait jong ka Ranikor Civil Sub Division haba kren kum u kongsan, u la ong ba ban ïohi ïa ki hep khynnah kiba leit sha ki skul ka long ka jingkmen, namar kane ka pyni bad pynkynmaw ïa ka jingshong skul jong u ha ki 40 snem ba la leit. U la ai ruh ka jingïaroh ïa ki nongpynïaid skul, ba watla ka dei ka skul kaba don ha ki jaka ba kham kyndong hynrei ka jingwan skul jong ki khynnah ka long kaba bun bad poi da ki 300 spah duna ei ei.
Namarkata, u la ai khublei kyrpang ïa ki nonghikai ba watla ki don tang kyndiat hynrei ki la trei shitom ban ai ka jinghikai kaba paka na ka bynta ki khynnah skul kiba long ka lawei jong ka shnong ka thaw, ka ri bad ka jaidbynriew. U la pynpaw ruh ba haba pyrkhat ïa ka jingtrei jong ki nonghikai hapdeng ka jingïoh kaba rit eh, ka la long thik kumba ki shu trei ïa ka mission ne trei mon sngewbha. Kumta kum ki khynnah skul ki dei ban sngewthuh ba ki nonghikai jong ki ki dei ki kmie ki kpa kiba ar ha ka jingim, namar ka jingïakynduh jong ki ïa ki nonghikai ka long manla ka sngi ha kaba ki pynsan pynrangbah ïa ki khynnah ym tang ha ka jingnang jingstad hynrei wat ha ka burom ka akor, ha ka ïaid ka ïeng, ka kren ka khana.
U la pynkynmaw ruh ba ka jingleit skul ha ka por ba mynshwa bunsien ki shu leit skul kumto khlem da tip shai kan lam shaei, hynrei kumwei na ki ‘riew rangbah uba la poi ha ka kyrdan kaba kham ha jrong bad ban long ruh u nongshari ïa ki paidbah kum u ophisar sorkar u sngewthuh shai ba ka jingnang jingstad ka long ka kordor, kumta u sngewban ai mynsiem na ka bynta ki hep kiba rit, ki khynnah bad ki samla pule ba ka jingshong skul hi ka long kaba donkam haduh katta katta khamtam eh ha kane ka juk kaba mynta.
“Kum ki khynnah skul ki im ha kine ki sngi kaba dei ka juk jong ka jingïakhun ne Competitive World naduh kiba dang rit haduh kiba la san ruh bad haba phai ha ka jingshong skul lei lei ka long ka juk jong ka jingïakhun kaba shyrkhei bha namar kumba ong ka ktien, “tang kiba la leh bha, kita kiba lah ban lait im” kaba mut kin poi sha ka thong jong ka jingjop. U kyrmen namarkata, ba kum ki khynnah skul haba ki leit sha ki skul pule ma ki ki don ha la ki jong ki jong ki thong ban pynurlong ne pynwan dur ka bynta ka lawei.
Haba kren shaphang ka kam ïalehkai, u la pynkynmaw ka dei kawei na ki bynta ba kongsan ha ka jingim jong ki briew namar ka jingïalehkai ne kilamnet ne pynkhih met ka ai ha ngi ïa ki met kiba koit ba khiah, ki ai ki jingmut jingpyrkhat bad ka jabieng kaba khlaiñ, bad ka met ka phad ba khih ba ksar, ki thied ki jaw, ki dohksah ruh ki shait ki khlaiñ. “Haba ki don hapdeng jong ki jingïalehkai, kum ki khynnah skul ki dei ruh ban don ïa ka thong bad kata ka long ban ïoh ïa ka jingjop ym ban shah rem”, kyntu u bah H. Staline Diengdoh.
Ha kajuh ka por u la kyntu bad ai mynsiem ruh na ka bynta ki kmie ki kpa ba ki dei ban pynshlur ïa ki khun ki kti jong ki ba kin leit sha ki skul pule namar ka long kaba donkam, bad ka jingong ba ki kmie ki kpa kim lah ban phah skul ïa ki khun namar ba ban ka jingduk kane ka long kaba bakla namar ha kane ka juk ba mynta ki jaka pule ki la don kyrhai ym ha ki por ba mynshwa ki nongleit skul ki hap ban ïaid kjat da ki 3 bad 4 kynta ban poi sha ki skul pule. Hynrei ha kine ki sngi wat ka sorkar ruh ka aiei ïa ki jingdonkam jong ki khynnah skul kum ki kot ki sla, ki uniform bad wat ïa ka ja sngi ruh ka ai lyngba ka Mid-Day Meal, namarkata, wat pynleh noh ei ïa kane ka kabu.
Na ka bynta ki khynnah skul ha kaba ïa dei bad ka pule puthi, u bah H. Staline Diengdoh u la ong ba kum ki khynnah skul ki dei ban long kiba minot, treishitom bad don ka mynsiem jong ka jingïakhun ha kiba bun ki bynta khnang ba ka thong bad ka lawei jong ki kan long kaba phyrnai namar ki im ha kine ki sngi jong ka jingïakop la ha kano kano ka bynta ne ka jingïaleh.
Ïa ka jingïalang la pynïaid da u babu S.P. Marweiñ, ka jingkren pdiang na ka H. Lyngdoh ha ryngkat ka jingïadonlang jong ki para nonghikai bad kumjuh ruh ki kmie ki kpa jong ki khynnah skul.