22 tarik yn ïaid rally ki nonghikai skul Adhoc bad ki khun ki kti

Shillong, ïaïong, 10: Ka Federation of All School Teachers of Meghalaya (FASToM) kaba long ka synjuk jong ki nonghikai skul Adhoc hapoh kane ka jylla Meghalaya bad kiba dang ïai bteng ïa ka jingïakhih ban pynsngew ïa ki mat jingdawa sha ki tyndong skhor jong ka Sorkar Jylla, ha ka jingïalang paidbah kaba la long ha Tura, West Garo Hills District ha ka sngi Saitjaiñ ki la shim ïa ka rai ban pynlong ïa ka jingïaid rally ha nongbah Shillong.
Ha kane ka jingïalang ba la ïashim bynta da ki spah ngut ki nonghikai skul Adhoc kiba hikai ha ki skul Adhoc jong ki district bapher bapher ka Rilum Garo, ka FASToM ka la shim ïa ka rai ban pynlong ïa kane ka jingïaid rally ha ka 22 tarik mynta u bnai.
Ka FASToM ka la shim ïa kane ka rai hadien ba ka Sorkar Jylla kam pat ai satia ïa ka jingkular ha kaba ïadei bad ka jingdawa ban kyntiew kyrdan Deficit ïa ki skul Adhoc. Ka FASToM ka la tyrwa ruh ïa ka Sorkar Jylla, lada kam lah ban pynkiew kyrdan Deficit, ka dei ban shu pynkiew ïa ka tulop da T.18 hajar naduh ka kyrdan Lower Primary haduh Higher Secondary bad kumjuh ban pynkiew ïa ka jingsiew tulop da san percent ka ban treikam manla u snem.
“Ha ka jingïaid rally ha nongbah Shillong yn sa ïashim bynta lang da ki nonghikai, ki kmie ki kpa, ki khun ki kti ki kurim bad ki bahaing hasem jong ki nonghikai, ki khynnah skul barim bad ki paidbah nongkyrshan,” ong u General Secretary ka FASToM u Bah Andrew Lyngkhoi ha u kyrwoh ba la phah sha ki lad pathai khubor.
Une u nongïalam ka Seng u la pyntip ba kane ka jingïalang ka la shim ïa ka rai ban pynlong pat sa ïa ka Non Cooperation Movement kaba khlem pud sngi. “Ka FASToM kan sa boycott ïa ka jingleit skul, ban pynbeit ïa ki jubab eksamin jong ki khynnah skul bad kiwei kiwei ki kam ba la bynshet da ka Sorkar,” ong une u nongïalam ka Seng.
Shuh shuh u la pyntip ba ka seng kan ym pynlong satia ïa ka jingïashong kyllaiñ myngngor ha ka 11 tarik mynta u bnai kaba hap ha ka Lah Sngi U Blei namar ka jingdon jong ka Shad Suk Mynsiem. Ka jingïakhih kan sa bteng naduh ka 12 tarik mynta u bnai, kata ha ka sngi Baar hakhmat ka ophis treikam jong ka MBoSE tad haduh ban da pynbna da kumwei pat.
U la pyntip ba ki nonghikai skul Adhoc kin dang ïai bteng ban deng ïa ki ribon iong haba leit sha skul ha baroh kawei ka jylla.
“Ïa kiwei kiwei pat ki jingpynbna yn sa pyntip hadien,” ong une u General Secretary jong ka FASToM.
Dang shen u Myntri ka tnat Pule Puthi ka Sorkar Jylla u Bah Lahkmen Rymbui ha ka jingïakren bad ki lad pathai khubor u la kren da kaba shai ba ka Sorkar Jylla kan ym lah satia ban kyntiew kyrdan Deficit ïa ki skul Adhoc na ka daw ka jinghiran ka pla tyngka hynrei ha kaba ïadei bad ka jingtyrwa ban pynkiew da ka tulop kaba T.18 hajar, u la ong ba ka tnat Pule Puthi kan dang hap ban bishar bniah bin pa bin shwa ba ka Sorkar Jylla kan shim ïa ka rai kaba khatduh.
Na ka liang u Nongaiktien jong ka FASToM u Samla Mayborn Lyngdoh u la ong ba ka Seng kan ym shahniah daleilei ruh em ïa ka jingkren jong ka Sorkar tang ha ki lad pathai khubor katba ka kam pat ai ïa ka jingkular sha ka Seng lyngba ka jingthoh.