Shillong, ïaïong, 10: Ka Hynñiewtrep Youths Council (HYC) kaba pynpaw ïa ka jingbym hun halor ka jingïasoi jong ka Sorkar Meghalaya bad ka Sorkar Assam ïa ka Memorandum of Understanding (MoU) ban ïapynbeit ïa u pud u sam, ha ka sngi Saitjaiñ, ka la kynthoh tyngeh kumno ka Sorkar Meghalaya ka ai ei ïa ka jaka kaba 18.46 sqkm sha ka Assam khlem ka jingbit jong ki trai khyndew.
“Kane ka Sorkar kam shym la pynbeit pud hynrei ka la leit ban ïadie pud bad ka Assam. Kane ka paw shai ba ki la die ïa ka 18.46sqkm khlem ka jingbit na ki trai khyndew, na ki bor synshar Hima lane na ka Khasi Hills Autonomous District Council (KHADC),” ong u Vice President ka Seng u Bah Donboklang Kharlyngdoh haba kren ha ka jingïalang pynskhem ïa ki nongkitkam jong ka HYC Nongtrai Unit ha ka sngi Saitjaiñ.
Dang shen u Myntri Rangbah ka Jylla Meghalaya u Conrad K. Sangma bad u Myntri Rangbah ka Jylla Assam u Himanta Biswa Sarma ki la ïasoi ïa ka MoU hakhmat u Myntri ka tnat Kam Pohing u Amit Shah ha Delhi ban pynkut noh ïa ka jingïakajia ha ki hynriew tylli ki jaka kiba don ha khappud ha ka kylla kaba nyngkong.
U Himanta u la pyntip ruh dang shen sha ki lad pathai khubor ba ka jingïapynbeit pud ha ka kylla kaba ar kan sdang biang la kumno kumno ha u bnai Jylliew ne Naitung mynta u snem.
Haba kren halor ka jingdawa ïa ka Inner Line Permit u Bah Kharlyngdoh u la ong, ‘kum ka jaidbynriew ngi donhok ba ngin ïoh noh ïa ka ain ïada ri ne ka ILP kaba la pynslem da ki nongïalam ka BJP na nongbah Delhi. Ngi kyrmen ba ka jingïakhun phainal bad ka Sorkar NDA, ka Jaidbynriew Hynñiewtrep kan sa jop bad ngin sa ïoh ïa ka ILP kumba la ïoh ka Jylla Arunachal Pradesh, ka jylla Mizoram, ka jylla Nagaland bad ka jylla Manipur.”
“Katba ka jaidbynriew ka dang ap ban ithuh noh ïa ka ktien Khasi ha ka Khyrnit Baphra jong ka Riti Synshar ka Ri India hynrei ngi la shah ibeiñ pynban da kaba phah pynlong Compulsory ïa ka sobjek Hindi na ka bynta ki skul haduh ka kyrdan pule Klass X,” u la ong.
Ki nongkitkam jong ka Nongtrai Unit ki long, u President Bah Dering Lyngdoh, Vice-president i/c Admin Bah Hilarious Borwan, Vice President i/c Finance Bah Shomborwel Stembon, General Secretary Bah Sylvester Dkhar, Assistant Secretary Bah Buddien Shabong, Education Secretary Bah Starling Lyngdoh Shnong, Organising Secretary Bah Kalin Lyngdoh, Publicity Secretary Bah Jeffrey Lyngdoh Sohiong, Sports Secretary Bah Liwelstar Syiemlieh bad 13 ngut ki dkhot.
