Shillong, Iaiong 10 : Ki nongïalam jong ka seng Hynniewtrep People Front (HPF) hapoh ka jingïalam jong u president bah Apbor Nongrum jong ka Ri Bhoi District ki la leit ban jurip ïa ka surok na Zero Point sha pham Kyrdemkulai kaba la dep ban siang Mawsalin hynrei pat sdang ïa ka jingsiang rong.
Na ka liang jong ka seng ka ai khublei ïa ka PWD kaba la pyndep ïa ka jingsiang rong ïa ka surok ha katei ka thaiñ kaba ïaid na Sumer bad mih sha Kyrdemkulai, Na Lad Zero sha Pham Kyrdem Kulai bad na ka shnong Udiker sha Zero Point la dep ban siang rong kala pynsuk shisha ïa ki paidbah ha ka leit ka wan.
Hynrei kaba dang sah mynta ka long na Zero Point sha Pham Kyrdemkulai kaba don kumba 6 Km ei ei kaba dang sah teng, ha ka jingleit jurip ka seng ka la shem ba la dep ban siang Mawsalin hynrei ym pat idak ban siang rong , ka HPF ka kyntu ïa ka PWD ba den ban pyndep noh ïa ka jingsiang rong shuwa ban wan ka lyiur.
Na ka liang ka seng ka pynpaw ïa ka jingsngewnguh ïa MLA kane ka jaka u bah Jason S Mawlong ba la trei shitom ban pynïoh skhim na ka sorkar ban maramot ïa katei kitei ki ar tylli ki surok kiba leit sha Zero Point, ha ka juh ka por ka seng ka kyntu ïa u MLA ban kren ïa ka PWD ba kin pyndep noh ban siang rong ïa katei ka surok kaba dang sah.
