Shillong, ïaïong, 10: Uwei u shipai BSF u la mynsaw jur na ki bynta jong ka khlieh bad ka durkhmat hadien ba ki snar nongkhaii be-aiñ na India ki la kawang ïa u da ki maw katba u dang pyrshang ban kthong ïa ki ha ka por ba ki dang thmu ban shalan be-aiñ ïa ki jingtah pynbhabriew bad kiwei kiwei de ki mar sha u pud u sam jong ka ri Bangladesh.
Kane ka la jia ha ka sngi Saitjaiñ ha khappud jong ka South Garo Hills ba la pahara da ki shipai BSF jong ka 43 Battalion.
Katkum u kyrwoh ba la phah da ka tnat shipai BSF Meghalaya Frontier, Shillong, la ong ba kine ki snar nongkhaii tuh ki la ther da ki maw ïa ki shipai BSF katba ki dang ïaid pahara bad ha kane ka jingjia uwei u shipai u la mynsaw.
Wat hapdeng ka jingmynsaw, une u shipai BSF um shym la siat kuli ïa kane ka kynhun ki snar nongkhaii hynrei u la lah ban ïada na ka jingkhaii tuh ïa kine ki mar sha ka ri Bangladesh.
